Thawhlehni khan Lunglei Municipal Council (LMC) inthlan atana candidate-te sum senso endikna neih zawh a ni a. Endik vawi thumna leh a tawpna neih a nih hnuah ZPM-in sum an seng tam ber.
LMC inthlan atana candidate-te sum senso dan endikna vawi thumna leh a tawpna chu Accounts & Treasury Department-in an kalpui a. Lunglei Treasury Officer Vanlalrosiama Ralte chuan Ward I atanga Ward VI endikin, PC Lalrammuanpuia, Audit & Accounts Officer chuan Ward VII atanga XI-te a endik a ni.
Candidate zinga campaign nana sum seng tam ber chu INC candidate Elizabeth Vaninmawii, Ward No. VIII a ni a, Rs 87,530 a seng a; Ward No. VIII MNF candidate C Lalrindiki’n Rs 73,175 sengin a dawt a, Ward No. IX-a ZPM candidate Zorinsanga Hmar-in Rs 71,620 sengin a zui leh a ni.
Candidate zinga campaign nana seng tlem ber chu BJP candidate Lalmuanpuii, Ward No. V a ni a. Rs 6,840 a seng.
Party hrang hrang zinga candidate-te tana campaign nana sum seng tam ber chu ZPM niin, Rs 4,87,292 an seng a. Sum seng tam pahnihna chu MNF niin Rs 4,77,625 an seng a, pathumna INC-in Rs 4,22,466 leh BJP-in Rs 1,69,390 an seng bawk.