Aizawl: Chief Minister Zoramthanga chuan kil tin atanga hmun hrang hranga ruihtheihthil lut lo danga do hneh tur chuan tanrual a tul tih a sawi.
71st BN Mullik Memorial All India Police Football Championship 2022-23-a Mizoram Police an champion chu nimin khan 1st Bn. MAP Ground, Armed Vengah a lawmna buatsaih chu khualllian niin Chief Minister Zoramthanga’n a hmanpui a. Thu sawiin, Mizoram chu thenawm ram nena ramri intawm a nih avanga dan phal loh hrang hrang tawlh luhna kawnga hman a ni a, hemi do leta lo dan hna chu thil pawimawh tak a nih thu a sawi.
“Ruihhlo, zu leh sualna dang dang min hnuk hniamtu chu huaisen taka kan suta eng bawihah mah tang lo tura huaisenna leh tumruhna neih a pawimawh a ni,” a ti.
Khualzahawm, Home Minister Lalchamliana pawhin thu sawiin kum 2008-a sports quota-a police-ah mi lak hnuhnun ber a nih thu leh chuti chunga kum sawm a chuan hnu pawha India ram pum police zinga football champion a ni thei chu thil ropui tak nia a hriat thu a sawi.
Home minister chuan force lam chu sorkar tan sum lalut tura ngaih a nih loh laiin Mizoram Police 3rd IR Bn. te, Assam-a awm avanga Rs vbc 73 chuang Mizoram sorkar pek a nih thu te, SBI tan venhimna an pek man Rs vbc 8 chuang sorkar pek a nih thu te a sawi bawk.
He hunah hian DGP Devesh Chandra Shrivastava, IGP (L&O) Lalbiakthanga Khiangte, MPSCCB chairman ni bawk leh Mizoram Football Association aiawhin Lalnghinglova Hmar ten thu an sawi.
71st BN Mullik Memorial All India Police Football Championship 2022-23 hi March 11-21, 2023 chhung khan Srinagar-ah neih a ni.