- Ruata
Honda Motorcycle & Scooter India chuan India rama scooter hralh tam ber leh market-a hmahruaitu ni char char, an Activa scooter chu OBD2 milin 2023 model an tlangzarh leh ta a, a man hi Rs 78,920 (ex-showroom) a ni a. 2023 Honda Activa 125-ah hian H-SMART variant thar a awm dawn bawk a, Rs 88,093 (ex-showroom) man a ni dawn a ni.
2023 Activa 125 hi rawng chi 5 – Pearl Night Start Black, Heavy Gray Metallic (Drum variant-ah a awm lo), Rebel Red Metallic, Pearl Precious White leh Mid Night Blue Metallic te a awm a. A khawl lamah chuan 125cc PGM-FI engine khawl a hmang a, hei hian Enhanced Smart Power (eSP) a nei a ni. eSP technology hian tui heh si loin a khawl theihna tam thei ang ber phawkchhuak turin a pui a, silent start a neih bakah a khawl chu eco-friendly khawl dam leh fai tha takah a chantir a. He 125cc khawl hian 8.1bhp power chu 6,500rpm-ah a pechhuak thei a, 10.3Nm torque chu 5,000rpm-ah a pechhuak thei bawk a ni.
2023 Honda Activa 125 hian Honda’s H-Smart Tech a keng tel a, hei hi turlai car te a kan hmuh ang niin Smart Key a ni dawn a. SmartFind feature a nei dawn bawk a, he feature hmang hian a chahbia hmeh tur pakhat hmeh chuan indicator light palite a ti eng rual vek a, lirthei awmna hmun hriat awlsam nan a tha dawn hle a ni. Smart Start feature a nei dawn bawk a, hemi hmang hian car tam tak angin chahbi vuah kher lohin he scooter hi a tihnun theih dawn a, hemi thawk tur hian smart key hi lirthei atanga metre 2 vela hlaah a awm a ngai thung a ni.
Smart Unlock feature a awm bawk a, hei hian chabi vuah kher loin lirthei lock leh unlock a ti thei a. Smart Safe feature a awm bawk a, hei hian Mapped Smart ECU a nei bawk. ECU hian ECU leh Smart Key inkarah electronically marching (ID) hmangin security device angin hna a thawk a, chuvang chuan lirthei rukbo lakah a veng thei a. Smart key hian immobilizer system a nei a, hei hian a chahbi bik ni lo hmanga tihnun tum te lakah a veng thei dawn bawk a ni.
He scooter thar hian Two Lid Fuel Opening System danglam tak a keng tel bawk. Honda chuan bungraw dahna 18L a zau hi helmet tih loh thildang dah tel theihna turin an design thar niin an sawi a. H-Smart variant hian Lock Mod a nei dawn a, hetah hian a chahbi vuah ngai lovin 5 in 1 function (lock handle, ignition OFF, fuel lid open, seat open & ignition ON) a tih theih dawn a ni.
Honda scooter lar leh hralh tam ber Activa thar, hmanraw changkang leh tunlai taka thawm a lo chhuak leh hi India ram tan chuan lawmna a ni dawn a. Keini Mizoramin scooty tia tunlai scooter rawn chhuak ho kan sawi ang chiah hian heng lirthei ho sawina atan hian hmun thenkhatah chuan ‘activa’ tih an hmang hial a. Heti khawpa lirthei lar leh hralh tam hi a changkang zawk leh model thar zawk a lo chhuak leh ta a, leitu tam tak pawh nasa taka a hip belh a beiseiawm hle a ni.