Myanmar sipaite hian NLD chak tuma inthlannaah khan dik lo tam tak a awm niin an sawi a, hei vanga thuneihna chhuh ta an nih thu an sawi a; mahse, a hranpaa chhuitute chuan chutiang a awm lo niin an sawi thung.
Sipaite hruaitu ber, Senior General Min Aung Hlaing-a duh lotute chuan politics hmanga thil a tih tum a tih theih nan hetiang hian a che ta mai niin an puh.
Tuna inthlan an sawi pawh hi a ni an la puang lo va, a la hlat a rinawm zawk hle a. July thla pawh chu ruahmanna an nei a; mahse, a nih a rinawm loh zawk.
February khan sipai sorkar hian emergency an puan mek chu thla ruk dang tal pawh sei leh a ngai dawn niin an lo sawi lawk tawh a, hei hi dan ang taka inthlan a la rem lohna tur langsar a ni ang.
Venhimna lam pawh chhuanlam an la nei a. Sipaite hian an ramah hian thunun loh lai an la ngah hle a, hmun tam takah anmahni duh lohna leh ralthuam nena beih letna an la tawng nasa.
Tual chhunga viltu pawl chuan sipaiten thuneihna an chan atang khan mi 3,100 chuang thi tawhin mi 20,000 chuang an man tawh bawk niin an tar lang.
Myanmar sipaite hian civil mite pawh an that nasa hle a, a bikin anmahni duh lotute chu tu pawh ni se kut an thlak zel nia sawi an ni.