Aizawl : Khawzawl District Tennis Association (KZDTA) Tennis Court, PWD Complex, Khawzawl Veng- thar ami chu nimin khan bialtu MLA, Deputy Chief Minister Tawnluia’n a hawng.
KZDTA Tennis court hi kum 1993-a hman tan niin, tunhnaiah Balaji Construction-in an corporate social responsibility fund (CSR fund) hma- nga a chhuat chhun zawl hna an thawhsak hnu ah bialtu MLA Tawnluia MLA fund Rs. nuai 2 hmanga cheithat (renovate) a ni.
Tawnluia chuan Khawzawlin Tennis court hmunhma nuam tak an nei thei chu lawmawm a tih thu sawiin, hmunhma tha petu PWD hotute hnenah lawmthu a sawi a. Khawzawl khuain rual an awh thinna te district kentel hmasawnna ten an phuhru mek zel nia sawiin, hmasawnna hnathawh kal mek te chu district fahrin an nih thu a sawi.
Deputy Chief Minister chuan Khawzawl Vengtharah Auditorium changtlung tak din a nih tur thu sawiin, hnathawh tan thuai a nih a beisei thu a sawi a. Tunhnaia Khawzawlin Mizoram huap Volleyball leh Badminton inelna lian a thlen bakah Mizoram Football Association (MFA) Cup 2023 thleng tura thlan an ni pawh lawmawm leh chhinchhiahthlak a nih thu a sawi bawk.
Tawnluia chuan Tennis court hmangtute bakah khawtlang mipui tan Community Toilet PWD Complex-a dah a nih theihna tura theihtawp chhuah a intiam a. Khawzawl district-a hmunhma hrang hrang ten hmasawnna kawng an zawh zel theih nan theihtawp a chhuahpui zel tur thu a sawi bawk a ni.