Portuguese khawpui, Lisbon-a Muslim sakhaw hmunah hmeichhe pahnih vih hlum an ni.
Thawhlehnia beihna hi Avenida Lusíada-a Ismaili Centre-a thleng niin a titu nia hriat hian chem lian tak a keng a, police-in a ke-ah an kahsak.
Man zui niin damdawi inah dah nghal a ni a, hetianga a tih chhan hi hriat a ni lo.
Police chuan a vittu nia hriat hian centre a luh hnu reilo te, an ram sanaa chawhma dar 11:00 (India-a tlai dar 4:30) pelh hretah kohna an dawng nghal.
Officer-te chuan a thiltih chu tawp turin an ti a, an thu a zawm loh avangin an kap ta a ni.
Amah hi Afghan nia rin a ni a, a vih hlumte erawh Portuguese ve ve an ni a, pakhat hi he thil thlenna centre-a saptawng zirtirtu a ni a, pakhat hi a classmate niin Portuguese chanchinbu chuan an tar lang hlawm.
Prime Minister Antonio Costa chuan pawi a tih thu leh a tih chhan hi ‘a hma thei anga’ chhui chhuah a nih tur thu a sawi.
Home Affairs Minister Jose Luis Carneiro pawhin ‘thil thlen dan leh a chhan’ chu chhui zui nghal mek a nih thu a sawi ve bawk.
A titua an puh hi ‘la valai tak’ niin a sawi a, fa pathum naupang tete neiin a nupuiin Greece-a refugee camp-ah a thihsan tawh niin a sawi.
Afghan hnam pawla an president, Omed Taeri chuan a beitu hi ‘kum khat emaw, a hma lam deuh emawa Portugal lut’ niin a sawi a. Ismaili centre pawh hian an lo pui tawh thin tih a sawi.
Carneiro chuan a vittu nia an puh hian tun hmain centre-in an kalpui chhimin Portuguese tawng zir tur te, chaw an sem leh naupang enkawlna dawng turin a kal fo tawh thin niin a sawi.
Police chuan mipuite chu Ismaili Centre hnaiha kal rih lo turin an ngen.