Lunglei Municipal Council (LMC) inthlan hmasa berah nimin khan mipuiten boruak muanawm tak hnuaiah vote an thlak.
LMC-ah hian ward 11-ah awmin, polling station 44-ah mipuiten nimin zing dar 7 atangin vote an thlak tan a, tlai dar 4 thleng vote thlak tura ruahman ni mah se, dar 4-a polling station thleng hmante chu vote thlak tir vek an ni a; dar 6 velah polling station-te khar fel a ni hlawm.
Mizoram State Election Commission (SEC) hotute chuan LMC inthlan hi tluang taka neih a nih thu an sawi a, polling station thenkhata EVM chiang lo deuh awmte pawh siam that thuai a ni tih an sawi.
SEC-in an tar lan danin nizan zan dar 6:30 khan vote tla za-a 72.03 a ni a. Ward no XI-a Lungpuizawl Polling Station-ah vote tla tha berin za-a 87.79 a tla.
Polling station-te hi khar vek a nih hnuah vote thlakna hmanruate chu Saikuti Hall-a strong room panpui nghal zel a ni a. Vote tlate chu April 3-ah chawhma dar 10 atangin Saikuti Hall-ah hian chhiar a ni dawn a, counting hall pahnihah vote chhiarna tur dawhkan 12 ve ve ruahman a ni.
LMC inthlanah hian vote nei mi 40,548 an awm a, political party pali atanga candiate awmin, MNF, Congress leh ZPM-in ward awm zawng zawng an chuh kim vek a, BJP-in ward pakua an chuh a, independent candidate an awm lo a ni.