April 1, 2023-a Mizorama Union Home Minister Amit Shah lokal tur chu mi thenkhatin an chah luh anga an sawi chu thu belhchian dawl lo a nih thu a sawi.
BJP Mizoram pisa, ‘Mipui Rûn’-ah nimin khan thu thar thehdarhtute kawmin Vanlalhmuaka hian, Union Home Minister Shah-a’n BJP sorkarin India ram state hrang hranga hmasawnna hnathawh a thawhte a hawn rualin, Mizoramah pawh hmasawnna ruhrel hrang hrang hna a thawh tawhte leh lungphumte rawn phum turin a lo kal dawn niin a sawi.
Vanlalhmuaka hian, “Union home minister lo kal tur hi tute emaw chah chhuah a ni lo a. Mi thenkhatin Assam Rifles sawn chhuah chungchangah pawh tute emaw nawr avanga chhuak tur anga sawite leh Assam Rifles sawn chhuahna atana union minister rawn kal tur anga sawi awm hi thu dik tawk lo leh belhchian dawl lo a ni,” a ti.
BJP state president hian BJP kaihhruai sorkar laipuiin state hrang hranga hmasawnna hna a thawhte chak taka um zuia a tahtawla hawn hna a thawk thin a. Mizoram pawhin chutiang ruahmanna chu a dawn ve avangin Shah hian Mizoram a tlawh dawn niin a sawi.
Zokhawsanga Assam Rifles insawn chhuah hun tur zawhna chhangin, “Union home minister-in a rawn hawng phawt ang a, thil awm zel dan tur chu a chiang chauh ang. Kan lo thlir ang,” a ti.
Vanlalhmuaka sawi danin April 1, 2023 khian Shah hian Rs. vbc 163.237 senga Zokhawsanga Assam Rifles Battalion Headquarters Complex siam te, Champhai Kellungliah-a Rs vbc. 19.88 senga Impounding Dam and Development of Recreation Centre sak te, Rs vbc 10 senga Lianchhiari Rûn sak te, Rs vbc 119.2 senga Smart City hnuaia Integrated Command & Control Centre (ICCC) sak te leh Rs. vbc 2.70 senga Bairabi-a warehouse sakte a hawng dawn a ni.
Heng bakah hian Rs vbc 193 senna tur, Aizawl-a Laldenga Centre sakna tur te, Rs vbc 2.70 senga Aizawl-a warehouse sakna tur te, Rs vbc 71 senga West Phaileng leh Marpara inkar kawng thawm thatna tur te, Rs vbc 781.85 senga Zorinpui atanga Longmasu, NH-502A inkar kawng laihna tur te, Rs vcb 329.70 senga Aizawl Bypass (Package-1), NH-6 laih tur leh Rs vbc 720.72 senga Aizawl Bypass (Package-3), NH-6 laih tur lungphum te a phum nghal bawk ang.