Mizoram Super League champion thar an awm a. Vawi hnih champion tawh Khatla TBL in an lallukhum an la kir a. A vawi thumna atan MSL trophy an chawi.
Thawhlehni zanah R. Dengthuama Indoor Stadium-ah MSL8 Finals game 2 hi khelh a ni a. 81-73 in Khatla TBL in Zarkawt BCA an hneh a. 2-0 a Final Series la in an champion.
Inkhel pawimawh
Zirtawpni khan Game 1-ah Khatla TBL hian 76-73 in hnehna an chang tawh a. Inkhel inhnehtawk leh hmuhnawmah a dingchang zawkah an tang.
An tan hnehna chan hi champion-na a ni tih hria in lehlamah Zarkawt BCA in chak ngei ngei tulna inkhel a ni tih an hria.
Khatla lamin bul an tan tha a, point pawimawh nei thei zawkah tangin hma an hruai nghal. Nimahsela Zarkawt BCA an hnufual rei duh bik lo. Second quarter-ah tang viau in halftime-ah point khat chauhin an inthlau a. Third quarter-ah BCA an pawng zawk.
Mahse a tawpah erawh Khatla TBL an tlo zawk a. A zawna vawi li champion tawh Zarkawt team tan lehthal theih an ni tawh lo.
Mimal inkhelah Joshua Keyes chuan point 34 score in Khatla TBL tana langsar a ni a. Vanlalthazuala chuan point 15 score in a thlawp.
Zarkawt BCA tan Lalrina Renthlei chuan point 19 score in an team tana point score hnem ber a ni ve thung.
Mimal chawimawina :
Most Valuable Player – Joshua Keyes, Khatla TBL
Defensive Player of the League – Matthew Remtluang Sailo, Zarkawt BCA
Rookie of the League – Lalhmachhuana, Khatla South Barons.
Fair Play – Chanmari Vikings.