Myanmar-a sipaiten an thunun election commission chuan an ram hruaitu an paih thlak tak, Aung San Suu Kyi kaihhruai political party chu inthlan dan thar zam hnuaia an inziah luh loh avangin thiah a ni dawn niin sorkar television-in a puang.
National League for Democracy (NLD) party hi sipai roreltuten inziak luh hun a tiam leh dan zam tur a zawm zawm lo political party 40 zinga miin Myawaddy TV chuan Thawhlehni tlaia chanchin thar a puanah a tar lang a ni.
January khan sipaite hian political party-te chu inthlan an tiam tihhlawhtlin nan dan khauh tak an zam thar hnuaiah thla hnih chhunga inziak lut turin a ti a; mahse, anmahni eptute chuan inthlan pawh awm se a dikin a fel fai tawk dawn lo niin an sawi lawk.
NLD hian inthlan huaihawt tum chu dan ang a nih loh avangin an chuh dawn lo tih an sawi bawk.
“Politics hruaitu leh activist tam tak man an nih laia inthlan hi kan pawm thei lo va, mipuite pawh sipaiten nasa takin an sawisa a ni,” tiin Suu Kyi-i party atanga MP atana thlan chhuah zinga pakhat, Bo Bo Oo chuan Thawhlehni khan a sawi.
November, 2020 khan NLD hian an ram parliament inthlanah chiang takin hnehna an chang a. Thla thum hnu lekah sipaite chu hel zuiin thuneihna an hnehchhuh a, Suu Kyi-i pawh an man nghal a ni.
Nobel Peace Prize pawh lo dawng tawh, kum 77 mi, Suu Kyi-i hi thubuai chi hrang hrang an siamsakah kum 33 tang turin hrem a ni a. A lamtangte chuan hetianga hrem a nih chhan hi politics-a a inhman theih tawh lohna tura an ruahman niin an puh ve thung.