Union Home Minister Amit Shah-a’n Aizawl atangin Zokhawsangah Assam Rifles an insawn fel vek tur thu Lok Sabha MP C. Lalrosanga a hrilh.
C. Lalrosanga hi nimin khan union home minister office-ah lengin hetah hian Shah-a hian Assam Rifles-te sawn chhuah an nih tur thu hi a lo hrilh a. C.Lalrosanga chuan lawmthu hrilhin Assam Rifles sawn chhuah chungchangah hian amah Shah-a leh sorkar laipui hruaitu dangte pawh vawi eng wmaw zat a lo nawr tawh thu te a sawi a. Sorkar laipui laka an thil ngiat tihhlawhtlin a nih dawn takah hian Chief Minister Zoramthanga pawh a lawm hle tih a hrilh.
Assam Rifles hi hun bituk chhunga insawn fel vek tura an duh thu a sawi chu chhangin Shah-a chuan, “An insawn ngei ang,” a ti a. Project eng emaw zat hawng tura Aizawl a tlawh tur pawh sawiin Assam Rifles battalion headquarters a hawn bakah Laldenga Cultural Centre lungphum pawh a phum tur thu MP hi a hrilh a ni.
Hemi hma hian C. Lalrosanga hi President Droupadi Murmu-i’n MP-te tana Rashtrapati Bhavan-a tukthuan a buatsaihah a tel a. Prime Minister Narendra Modi-a bakah sorkar laipui minister-te leh parliament in hniha member-te nen chawhlui an kilho a ni.