Argentina in world champion an nih hnuah result tha an neih belh zel a. Curacao nen friendly match khelin 7-0 in hnehna an chang.
Nilaini zingah Estadio Único Madre de Ciudades-ah Argentina in an mikhualte hi an hmachhawn a. An chhuanvawr Lionel Messi bawk langsar in first half-ah hattrick a siam.
Messi hian minute 20-na, 33-na leh 37-naah te goal a khung a. Ram tan goal 100 khung tling tawhin a zawna match hnih chhunga mellung pawimawh a kaina inkhel a ni a. Kar hmasa khan Panama nen an inkhelh tumin goal khungin club leh ram tan goal 800 a khung tling tawh a ni.
Nicolas Gonzalez leh Enzo Fernandez te chuan first half-ah goal an khung ve bawk a. Second half-ah Ángel Di María leh Gonzalo Montiel te chuan goal khung belh bawkin tun tum match hnihte hi Argentina in an ram a an fans te hma a World Cup an champion lawmna inkhel ni tura an duan a la ni a.
June thla hian September thla atanga an khelh tan tur 2026 World Cup qualifying atana inbuatsaihin inkhel an hmachhawn leh ang.
Inkhel dangah Thawhlehni zanah Belgium in Germany chu 3-2 in an hneh a. Kum 1954 hnua a vawikhatna atan Red Devils hian Germany hi an hneh.
RheinEnergieStadion-ah Belgium in first half-ah hneh takin Germany an thunun a, Yannick Carrasco leh Romelu Lukaku te hmanga goal khungin Germany in halftime dawnah Niclas Fullkrug penalty atangin goal khat an khung.
Second half-ah Belgium tan Kevin De Bruyne chuan goal khung lehin Germany in huntawp hma in Serge Gnabry hmangin goal khat an khung ve leh hman a ni.