School academic session thar, 2023-2024 atangin Mizoram sorkar hnuaia zirna ina lutten uniform rawng inang tlang an hmang tawh dawn a, zirlaiten sikul kai tan ni, April 5-a uniform inang an hak hman ngei theihna tura hmalak a ni.
Sorkar sikula uniform inang hman tumna hi nikum March khan rel fel a ni a, school education department pawhin hemi chungchanga mipui hriattirna chu nikum June thla khan a tichhuak tawh.
Hemi bawhzuina kal zelah March 15, 2023 khan district education officer leh sub divisional education officer te chu lehkha thawnin, April 5-ah zirlaiten uniform inang an ha ngei tur a ni tih a hriattir nawn leh a, zirna inten an zawm that leh zawm that loh enfiah turin a hriattir bawk.
Hemi chungchangah hian The Zozam Times-in sorkar hnuaia thawk zirtirtu pawl hrang hrang hruaitute a bepawp a, Primary leh Middle School Teacher Association hruaitute chuan April 5-a uniform thar hak hman a nih theih nan sikul tinin hma an la a, a man tur chungchangah pawh zirlai nu leh pate nen ruahmanna an siamho thu an sawi.
Association hruaitute chuan zirlai pakhatin uniform grant Rs 600 an dawn thin chu hmang tangkaiin he miin a daih loh chin, a thuina mante chu zirlaiten an tum ve thung tih an sawi a; zirna in thenkhatah chuan zirtirtuten sum an thawhkhawm a, Silchar-a puanthan man tlawm laa zirlaite hnenah man awm mang lova semte pawh an awm thu an sawi a. Sorkar ruahmanna tihlawhtling ngei tura hma an lak mek thu an sawi hlawm a ni.
Sikul uniform kekawr leh pawnfen rawng turah primary school-ah a dum pawl, middle-ah light grey niin, kamis var ban bul ve ve hak tur a ni a. High school leh higher secondary school zirlai tan kekawr leh pawnfen dum leh kamis var bar tlawn a ni ang.