Aizawl: BJP State Mahila Morcha chuan nimin khan ‘Sushma Swaraj Award’ semna hun an hmang a, he hun hmanpuitu, BJP State President Vanlalhmuaka chuan Mizoramah BJP sorkar hi party dangten an hlauh chhan chu BJP an sorkar tawhna state-ah hmasawnna a luan lut nasat vang a nih thu a sawi.
Upper Republic-a BJP State pisa ‘Mipui Rûn’-a award semna inkhawmah Vanlalhmuaka hian, “BJP sorkar tawhna state-ah chuan hmasawnna a luang lut nasa em em a, party dangten chance an nei lo a ni. Chutiangin Mizoramah pawh BJP sorkar ila chuan kawng hrang hranga hmasawnna a awm dawn vangin, party dang tan sorkar vena hun tha a awm tawh dawn lo tih an hriat avangin party dangte hian mipuite min sawi thaih ta mai a ni,” a ti.
Vanlalhmuaka hian award sem chhan sawiin, BJP hian kuthnathawktute, mahni kea ding tura hma la mek te, mahni kea ding duhten bank loan kaltlanga bul an tan theihna thlengin kawng a siamsak niin a sawi a. “Mizoram mipui taima tak tak leh hlawhtlinna kawngzawh mekte hian BJP-ah kawng a awm a ni tih hi kan hriat a, BJP sorkarnaah mi retheite tan kawl a êng zel avangin chu hamthatna chu Mizoram mipuite hian kan chan ve theih nan theihtawp chhuahin hma kan la a ni,” a ti bawk.
BJP hmeichhe pawl State Mahila Morcha President Lalbiakkimi’n mi 10 hnenah Suhsma Swaraj Award a hlan a ni.