Mizoram Police leh thuneitu dangten dan lova ramsa tawlhruk an man 995 chu Aizawl Zoological Park-ah dah luh an ni tawh a. Wild life (protection) dan tharah ramsa tawlh rukte hi forest department-in an man thei tawh dawn.
Aizawl Zoological Park hotute hnen atanga thudawn danin ramsa tawlhruk man hi July 7, 2019 atang khan Aizawl Zoological Park-ah dah tan a ni a, chung ramsate chu Champhai, Kolasib, Khawzawl leh Mamit district-a police leh forest deptt. tangkawpten an mante bakah BSF leh custom-in an mante an ni hlawm a. Sahuana exotic animal dah tam ber chu Champhai district chhunga man niin ramsa chi hrang hrang 679 zet a tling a ni.
Dan lova ramsa tawlh man, sahuana dah luhte hi sava lam chi hrang hrang, satel chi hrang hrang, zawng chi hrang hrang, laiking/awle (reptile) lam chi te, rul/saphai lam chi bakah sazu lam chi an ni.
Zoological Park hotute chuan ramsa puitling chinho chu harsa lo taka an enkawl zel theih thu an sawi a; hetihlai hian thenkhat erawh a note tak tak te, a tui atanga keu hlimte an la nih thin avangin an enkawl thiam lo va, an chaw ei tur leh a enkawl dan tur an hriat loh avangin eng emaw zat chu an thi niin an sawi.
Hetihlai hian Wild Life (Protection) Amendment Act, 2022 chu April 1, 2023 atangin hman tan a ni dawn a, he dan siam that hnuaiah hian ramsa tawlhrukte chu forest department-in manin court-ah an thlen thei tawh dawn a ni.
Dan siam that a nih hma kha chuan ramsa tawlh rukte forest department-in an duh thuin an man ngawt thei lo va, police nen an thawhdun a ngai a, chumi hnuah custom lamin court-ah an thlensak a ngai thin.
Wild Life Act siam that hman a nih hnuah erawh forest department-in dan lova ramsa tawlh ruk anmahnia an man theih loh avanga harsatna an tawh thin chu a awm tawh dawn lo a ni.