Kuhva rah tawlhin min tibuai hle mai a, vawiin thlengin man tawk an la awm reng bawk. Sorkar in a khap hneh miau loh avangin kuhva chingtute an mangang a, an thiam leh theih dan danin hma an la a, Assam chief minister thlengin an zu dawr tawh bawk.
Hetiang hi kan dinhmun a nih avang hian nakin zelah harsatna nasa zawk a thlen loh nan sorkar hian hma la nasa zual se la, khapna thupek khauh deuh deuh chhuah chungin enzuina nei uluk zual se la, mipui lam mangang an chet nat hma ngei hian chet la hmasa mawlh teh se.
Khawthlang lama kuhva chingtute zingah harsatna a thleng nasa zual a, hemi a nih avang hian Taitesena group YMA leh Langkaih group YMA te chuan Joint Group YMA Study Team dinin, heta Chairman leh Secretary tura an thlanchhuahte hian Assam CM chu a office-ah an zu hmu tawh a, Mizoram CM pawh a hranin an hmu leh tawh bawk. Tawngkam mai hi chuan chinfel a har lo a, sawi mai pawh a har hek lo. Sorkar zawk hian engtianginnge kuhva chingtute harsatna tawh hi a sutkian dawn tih erawh hriat a chakawm tawh hle.
He khawchhak lam atanga kuhva tawlh hi a la hluar zel a nih phei chuan kan hnam hian engemaw zawng talin nun dan tha lo kan neih phah ang tihte a hlauhawm a, sorkar hian kawng hmang dik zawk leh ramchhung kuhva chingtuten harsatna kan tawh loh dan tur kawng hi a ngaihtuah thuai thuai chu a ngai tawh hle.