Inpawngkahna pung nasa
Kumin chhung ringawtin US-ah hian inpawngkahna tia sawi theih hi vawi 130 chuang a thleng tawh a, heng zingah hian tun hnai lawka Nashville-a sikul pakhata zirlai naupang pathum leh thawktu pathum kah hlumna pawh kha a tel.
Hlawkna um lova thil zirchiangtu pawl pakhat, Gun Violence Archive-in an chhinchhiahna atanga a lan dan chuan tun hnai kum tlemah inpawngkahna hi a pung nasa hle.
Kum thum liam ta chhung khan kum tin vawi 600 vel a thleng ziah ang a ni a, ni khatah vawi hnih dawn thleng ziah ang a ni tihna a ni.
US-ah hian ‘mass shooting’ an tih, inpawngkahna tia sawi mai hi a hrilh fiahna chiah a awm lo va. Gun Violence Archive erawh chuan silaia inkahna thlenga mi pali emaw, a aia tam emaw thi leh hliam an awmna chin chu inpawngkahnaah a chhinchhiah lut thin a. An chhinchhiahah hian in chhunga thleng leh vantlang hmuna thleng pawh an telh vek a ni.
Hetianga pawikhawihna thlenga thi an chhinchhiah lian ber chu kum 2017-a Las Vegas-a thleng kha a ni a, mi 50 chuang thiin mi 500 vel hliam an awm a. Inpawngkahna thleng tam zawkah hi chuan mi 10 an thi tling ngai lo tlangpui.
Silai avanga thihna a pung
US Centers for Disease Control & Prevention (CDC)-in a chhinchhiah dan chuan kum 2021 khan silai chelek kaihhnawiha thi mi 48,830 an awm.
A hma kum, 2020 aiin 8% dawnin an tam zawk a, an chhinchhiah china an tam ber kum a ni nghe nghe.
Inpawngkahna leh silaia tualthahna dang thlengte hi chanchinbuten an chhuah nasa a, kum 2021-a thi zinga a zahve aia tam hi silaia mahni inkap hlum an ni.
Hemi kum hian mi 20,000 chuang zat thah an ni tih CDC chuan a tar lang bawk.
An chhinchhiah dan chuan US-ah hian ni tin silai avanga thi mi 50 chuang an awm ziah a ni.
Silai hmanga tualthahna hi Canada, Australia, England leh Wales bakah ram dang tam tak aiin a tam daih zawk a ni.
US-ah Silai engzat nge awm?
Khawvel pum huap pawhin mi mal kuta silai awm zat hi hriat a har hle a, Switzerland-a thil zir chiangtu, Small Arms Survey chuan kum 2018 khan US-ah hian silai maktaduai 390 chuang awm angin an ngai.
US-ah hian mi cheng 100 zelah silai 120.5 awm ang a ni a, kum 2011 kha chuan mi 100 zelah 88 niin a pung nasa hle a; ram dangte aiin mi cheng zat azira silai awm zat a tam daih zawk.
Tun hnai deuh zawka data tihchhuahah chuan US-ah hian tun hnai kum rei vak lo chhungin silai nei an pung nasa hle tih tar lan a ni a. Annals of Internal Medicine-in February-a zirchianna an tihchhuahah chuan January, 2019 leh April, 2021 inkar khan US-a puitling maktaduai 7.5 chuangin silai an nei thar nia tar lan a ni bawk.
Mi maktaduai 11 vel zetin an inah silai an dah lang niin an sawi a, naupang maktaduai 5 an tel bawk a. Silai nei thar zinga a zahve aia tam hi hmeichhia an ni a, 40% chu mihang emaw, Hispanic emaw an ni bawk.
Tuten nge silai thunun duh?
American tam zawk hi silai khuahkhirh duhtu an ni.
Zirchiannaah chuan American 57% chuan silai dan chu khauh zawk se an duh a, hetih lai hian nikuma Gallup-in ngaihdan a lakah chuan tlemin thunun duh hi an tlahniam niin an sawi.
32% chuan dan hman lai chu an duhkhawp rih a, 10% chuan ‘khuahkhirh nep deuh se’ an ti ve thung.
Silai khuahkhirh leh khirh loh duh dan hi party an zawm azirin a dang nasa hle bawk.
Gallup-in a zirna dangah chuan, “Democrat hi chuan khauh an duh a tih theih,” tia tar lan a ni a, an zinga 91% zetin khauh taka thunun an duh.
Hetih lai hian Republican zinga 24% chauhvin khauh an duh a, independent voter 45% chuan khauh an duh bawk.
State thenkhat chuan assault silai khap leh khuahkhirh dan an kalpui a. He dan hi state-in an kalpui dan a inang lo hlawm a, California-ah chuan assault hmanrua hi mi tlem tan tih loh an khap hmak a ni.