Kumin a NBA Playoffs a inlan ngei tum Los Angeles Lakers in an tum ram pan zelin season tawp lamah an insiamrem zel a. Chicago Bulls lakah tun season a vawi 38 an chakna ni chiah turin 121-110 in hnehna an chang.
United Center-ah Lakers hian season tirah roster an nei fuh lova, hei vang hian season laihawlah an insiksawi nasa hle. Ningani zinga inkhela an starting lineup hi tun season-ah starting line up chi hrang 38 an hmanna chiah a ni.
Tun tumah erawh an team duan dan a fuh chho tan niin anmahni ngei pawhin an ngai a. Point 38 score a rebound vawi 10 la tu Anthony Davis chuan, “Tunah chuan kan team mamawh theihna chu kan nei kim vekin ka hria. Kan hmang tangkai thiam a pawimawh dawn. Playoffs khel ngei turin result kan nei chho thei tih kan chiang.” a ti a.
Lakers starting lineup a LeBron James, D’Angelo Russell, Austin Reaves leh Jarred Vanderbilt ten Bulls starter te aiin 107-72 in point an score hnem zawk.
Star player LeBron James pawhin, “Tunah chuan ball sem thei kan ngah tawh. Chuvangin tuman ball kawl kan hlau thawng tawh lo. Eng team pawh hmachhawn ila, ball kan shoot thei tawh a, defence khel turin kan sei tha tawk bawk.” tiin beisei a neihsan thu a sawi.