MZP kaihhruaiin nimin khan MZP Pisapui-ah MZP, Muslim Welfare Society, Mizoram leh Central Mizoram Gorkha Youth Association (CMGYA) hruaitute an thukhawm a, Mizorama hnamdang dan lova sumdawnna kalpuite dapchhuah kawnga thawhho an rel.
Muslim Welfare Society leh CMGYA hruaitute chuan Mizorama hnamdang dan lova sumdawnna kalpuite MZP-in dapchhuah a tum chu tha an tih thu sawiin, a tul anga tawiawma thlawp an remti a. MZP pawhin Mizorama hnamdang dan lova sumdawnna kalpuite chu an sumdawnna tihtawp a nih theihna tura hmalak zel an tum thu an sawi.
MZP chuan tunhnai ah hnamdang dan lova sumdawnna kalpui an tam hle nia sawiin, Mizo hming hawha sumdawnna bakah, state pawn atangin man tlawmte tein phalna nei lo ten Mizoramah sumdawnna an kalpui nasa hle niin an sawi a. Heng mi te hi an bungrua an hralh zawh hnuah an haw leh mai zel nia sawiin, hei hi tualchhunga Mizo sumdawng ten an tuar a, nghawng lian zawk a neih hmaa titawp tura hmalak an tum thu MZP chuan an sawi a ni.
He hmalakna tur chungchang hi a tul angin pawl dang pawh sawipui zel an tum tuh MZP chuan an sawi a. “Kan ram leh hnam tana hmalakna a nih avangin Mizo mipuite thlawpna pawh kan ngen a ni” an ti bawk.