British driver, vawi sarih Formula 1 world champion ni tawh Lewis Hamilton chuan Mercedes in an elpui Red Bull Racing te umpha turin kum chuang an nghah a ngai mai thei niin a sawi a, team pahnihte inkar a zau hle nia a ngaih thu a sawi.
Anglo-German team hian a zawna season hnih nan an elpuite pha lo taka season bul an tan hnuah an car siamthat lam hna an thawk leh tan a. Theihtawp chhuah mahse hmasawnna chu kal nghal zung zung tura beisei theih a ni lo tih an hria.
Hamilton chuan, “Kan inkar tizim tur hian kumtluan a ngai dawn a, season tawp thleng kan mamawh ang.” a ti a. A teammate George Russell pawhin, “Tun dinhmunah chuan beisei kan nei sang tih sawi ngam pawh a ni lo. Red Bull hi keini aiin second khat chuangin an fal zawk rih tlat.” tiin Red Bull nen an inkar a zau tih a sawi ve bawk.
Red Bull Racing hian season bul tan atangin intlansiak an thunun hneh nghal hle a. Intlansiak hmasa pahnihah pakhatna leh pahnihna hauh nghal ve ve in tun kartawpah hian Melbourne-ah Australian Grand Prix-ah pawh rinkai an ni lehnghal.