Aizawl: Mizorama tlawmngai pawl lian hrang hrang intelkhawm, NGO Coordination Committee CYMA Committee Room-a thukhawmin SBI-in Mizote bank account atanga tax deduction at source (TDS) an lo lak chungchangah April 7, 2023 thleng SBI ngaihchan an rel.
NGO Coordination Committee chuan TDS-ah hian tribal-te chu dan hnuaiah chhiah awl tur a nih laia bank lamin sum an cut thin chu a hrethiam lo va, hemi chungchanga bank hmalakna chu tihtawp an duh a. Hemi kawnga hmalak zel dan tur leh SBI atanga an thudawnte an ngaihtuahho a ni.
NGO CC thutkhawm hian SBI-in TDS chungchanga an hmalaknate an thlirho a, SBI-in TDS an lakte chu nimin atang khan account thenkhatah dah let leh a nih thu an dawn avangin April 7, 2023 thleng SBI chu ngaihchan an rel a ni.
NGO CC hotuten an sawi danin TDS chungchangah hian tribal-te chu dan hnuaiah ngaihhnathiam an ni a, Income Tax Act 1961 hnuaiah leh Central Board of Direct Tax notification-ah ngaihhnathiam an ni vek a. Heti chunga tax chawi tura bank account atanga sum cut-sak thin chu NGO chuan a hrethiam lo va, a tul angin a tawp thlengin Mizo mipui tan hma an la zel dawn niin an sawi.
NGO CC thutkhawm hi Central YMA Vice President Lalhmachhuana’n a kaihruai a, committee-a tel pawl hrang hrang aiawhte an tel a ni.