Zanin atangin Premier League season kallaiah zinkawng hnuhnung zawh tan a ni dawn. International fixture khel tura chawlh hnuhnung ber hman a nih hnuah team ten an tum ram thleng turin tha tharin ke an pen leh tan ang.
Ram tana inkhel player-te an awm a, national team a kal ve lote tan chawlh hahdamna hun a ni thung. Tun kartawpah inkhel pawimawh a awm nual dawn.
Manchester City leh Liverpool an inkhel dawn a, title inchuhnaah he inkhel hian nghawng a nei thui thei. Newcastle United in Manchester United an mikhual dawn bawk, a sang pali inumnaah a pawimawh dawn.
Brighton-Brentford leh Crystal Palace-Leicester City te pawn nghawng thui an nei thei vek.
Title inchuhna hi club pahnih inkar a ni tawh. Chutihrualin UCL khel thei tura hmun pahnih la awm hi club parukin an la beisei thei vek. A tu ber nge ni dawn?
Tunge champion dawn?
League hmahruaitu Arsenal in khelh hmabak 10 an la nei a, point 8 in hma an hruai. Champion lai Man City in khelh 11 an nei. Beiseina an neih an chhawm nung dawn a nih chuan April 26 a an inkhelh hunah an tan chak ngei a pawimawh hle ang.
Gunners hi tun season-ah fak loh theih an ni lo. An tlawm hleithei lo tih ngam khawpin an tang thei a, nidang pha lova an inkhelh ni ah pawh point an hmu leh hram thin.
Game 28 an khelh tawh atang vawi 22 an chak a, hei vang hian anni tan vawi hnih khat chetsual pawhin buai loh theihna a awm.
Chutihrualin an fixtture hmabak a awlsam lo. City bakah Liverpool an la tlawh dawn. Newcastle leh Chelsea te pawh an la awm. Nimahsela Etihad Stadium leh Anfield an tlawm tumin an tlawm lo a nih ngat chuan champion thawkin an thaw thei tawh ang.
City tan champion turin match 11 an hmabakah chak vek a pawimawh hle a, Arsenal an chetsual zeuh zeuh beisei a ngai bawk. Tun season a an chak zawn rei ber hi league-ah vawi nga a ni. A awlsam dawn lo tih sawi nawn a ngai lo.
UCL ah tunge?
Pathumna a awm Manchester United chu kumtirah chiang tluka ngaih an ni tawh. Mahse an match hnuhnung 10 atang point 18 chauh an hmu a, hei vang hian ngaihtha ngawt thei an ni lo chiang.
Naktuk zana an hmachhawn tur Newcastle United nen point thum chauhin an inthlau a, an inkarah Tottenham an awm. Liverpool, Brighton leh Brentford tan palina a la beiseiawm vek.
Hei chauh hi a la ni lo. Manchester khaw club pahnihte hian FA Cup final an lut a nih chuan pasarihna thlengin European football khelh theih a ni dawn. Brighton leh Brentford ten an club chanchin a vawikhatna atan Europe a inlan ngei inbeisei in ke an pen ang.
Tunge tla dawn?
League-ah 12-naah Crystal Palace an awm. Manager Patrick Vieira tunhnaiah an ban, a chhan chu an dinhmun tha ni thin kha a tha vek tawh lo. League a mawng ber nen point li chauhin an inthlau.
Hei vang hian tun season-ah tla thei club an tam. Tlak hlauhawm team hi an tang na tawh thin a, eng team tan pawh a team hlauhawm an nih chang a awm fo thin.
Palace in an hnuaia Wolves, Leeds leh Everton te angin manager thar nen boruak thar duhawm neih an inbeisei. Julen Lopetegui, Javi Gracia leh Sean Dyche ten an club te theuh hi kawng dik an zawhpui tan niin an result-ah a lang.
Man City v Liverpool
Tun kartawpa club lian inkhel tur zingah Pep Guardiola vs Jurgen Klopp a thleng dawn. Dinhmun inang lo nimahsela club pahnihten chak mamawhna lian tak an nei ve ve.
Manchester City in buaina lian an nei, chu chu striker Erling Haaland inhliam a ni. Norway tana Euro 2024 qualifier khel thei lo a ni tawh.
A manager in dam lam a pan tih a sawi a, mahse a inkhel thei ang em tih a hre bik lo. “Erling a dam tha tawh hle, training session vawikhat kan la nei hman dawn, hetah hian a dinhmun a hriat ang.” tiin a sawi.
Liverpool manager Jurgen Klopp chuan an dinhmun siamtha zel turin an tan chak a pawimawh tih a sawi. “Inkhel pawimawh tak a ni a, kum dang nen a danglamna a awm lo. City lakah chuan a tha thei ang bera khelh a ngai reng. Inven uluk bakah football tha khelh a pawimawh.” tiin league-ah an boruak inang lo mahse khelmual chhungah engmah a inthlak loh thu a sawi ve bawk.