AZL: BJP Mizoram State President Vanlalhmuaka chuan Mizoramin a mamawh ber chu chief minister tha, mahnia thutlukna siam thei, mipa taka ram kaihruai ngam a mamawh niin a sawi.
An party pisa, ‘Mipui Rûn’-ah thu sawiin Vanlalhmuaka hian, “India ramah chief minister nei tha apiangin hma an sawn a. Khawvelah pawh prime minister leh president nei tha apiangin hma an sawn,” a ti.
Mizoramah pawh hmasawnna tha neih a nih theihna turin BJP Mizoramin hma an la mek nia sawiin, India ram pawhin mi huaisen, eirukna do ngam Narendra Modi a neih avangin hmasawnna chu khawvel hriat khawpin a thleng tawh a. Chutiang chiah chuan Mizoram pawh hian chief minister atan mipa dik tak, mahnia thutlukna siam thei leh hmathlir mumal tak nei a neih a ngai a. Mizoramin BJP sorkar a neih hunah chutiang hruaitu chu a neih dawn avangin Mizoramah hmasawnna dik a thleng dawn niin a sawi.
Vanlalhmuaka hian tun hnaia Aizawl khawpui atanga Zokhawsanga Assam Rifles insawn chhuah leh chhuah loha inhnialna a tam hle nia sawiin, “Assam Rifles sawn chhuak thei tu tak tak chu BJP te kan ni tih hi Mizoram mipuite hruatah vawiinah hian ka sawi duh a ni,” a ti.