Aizawl: Hachhek bialtu MLA Lalrindika Ralte chuan, “Kum tawpah kan inthlang dawn. Ka tan ka campaign dawn lo, kan bial mipuite tan ka campaign dawn,” a ti.
He thu hi nimina Bungthuam khuaa Langkaih Group YMA Conference a hmanpuinaah Lalrindika Ralte hian a sawi a. Politics hi sawi thiam avanga hmasawn tur ni se a hmasawn ber pawl an nih tawh tur thu a sawi a. A bial mipuite chu an thahrui chu huaisenna leh ngaihtuah dik pua an chakna atana an hman a ngaih thu a sawi a. “Kum li MLA ka ni ve tawh a, in hriat tur ang ka ni tawh. Ka that loh chuan a tha thlan mai tur a ni,” a ti.
Lalrindika Ralte hian ram leh hnam humhalh chungchang sawiin ram leh hnam humhalh tumtute ngaihtuahna hi a dikin a chhuanawm a, a pen chhuak tur dik tak YMA an penchhuak hi lawmawm a tih thu a sawi a. Mahni ram humhalh thei lo leh humhim zo lo nih hi a dik loh thu leh a zahawm loh thu a sawi. Ram leh hnam humhim turin theihtawpa beih zel chuan hlawhchham a awm dawn ni niin a sawi.
Langkaih Group YMA conference tanpuina’n bialtu MLA hian tangkafai cheng nuai khat a pe a. Langkaih Group YMA pawhin Lalrindika Ralte hi ram tana hnathawk chhunzawm zel tura an duhzia lantir nan iptepui leh chempui an pe bawk.