Special Judge POCSO Act-in naupang kumtlinglo khawih chingpentua puh, Vanlalhriattira, Hmuntha khua chu thiam loh a chantir a, kum 10 tang tur leh Rs. 20,000 chawi turin a hrem.
Court-in thuremna a tihchhuaha tar lan a nih danin Vanlalhriattira hian December, 2017 atanga January, 2018 inkar khan hmeichhe naupang kum 13 mi chu tum nga lai a mutpui a, hriat chhuah a nih hnuah naupang chhungten March 6, 2018-ah police hnenah FIR an thehlut a, Section 6, POCSO dan hmangin thubuai siamsak a ni.
Thubuai ngaihtuahtu, Special Judge (POCSO Act) Vanlalenmawia chuan thuhretu hrang hrangte a koh hnuah Ningani khan thutlukna siamin thiam loh a chantir a, nimin khan a hremna tur puang lehin hrehawm taka kum 10 tang tur leh Rs. 20,000 chawi turin a hrem a, sum a chawi tur hi a pe thei lo a nih chuan ni 30 tan belh turin a ti bawk.
Thudawn danin court-in thuremna a puan hmain Vanlalhriattira hi a tlan bo va, police-ten March 28 khan an man a. Thiam loh a chantir hnuah Central Jail-ah dah luh nghal a ni.