Manchester United left-back Luke Shaw chuan contract thar ziah a hnaih a, kum 2027 thleng club a cham turin inremna thar an ti fel niin an sawi.
Infiamna lam chanchinbu rintlak The Athletic chuan kum 27 mi Shaw leh United te hian hun engemaw chen atang khan inbiakna an nei tawh a. Tuna contract a neihlai hi kum 2024 nipui thleng daih a ni.
United lamin nikum December khan Shaw a contract a kum khat ziah belh theihna awm chu an lo hmang tawh a, mahse contract thar rei zawk ziahpui an duh.
Shaw hi United manager Erik ten Hag hnuaiah a pawimawh sawt hle a. Tun season-ah inelna hrang hrangah vawi 35 a inlan tawh bakah dressing room-ah team hmahruaitu pawimawh zing ami a ni mek.
England international hi Dutch coach hian left-back leh centre-back ah te chhawrin tun season a a player tangkai pawl a ni a. Goal khat a khung bakah midang khung tur vawi ruk a siamsak tawh.
Club lamin Shaw-a contract thar hi an la puangzar lem lova. Club neitu Glazer chhungkua in hralh an tumlai nimahsela Shaw contract thar chungchang hi a nghawng dawn lo nia ngaih a ni bawk.
United hian an player pawimawhte chelh chhunzawm tumin hma an la mek a, Shaw bakah hian Marcus Rashford leh goalkeeper David de Gea te contract thar ziahpui tumin inbiakna an neihpui mek.