Aizawl: MNF Adviser Lalruatkima chuan Assam Rifles sawn chhuah chungchangah MNF leh Congress ngaihdan a inan loh thu a sawi a. MNF chuan sipai chhuahsan tur ram hi mi mal hnena hlan an tum loh thu a sawi.
Revenue Minister Lalruatkima hian Zirtawpnia MNF Hnam Rûn-a chhung inkhawmah thu a sawi a. April 1-ah Union Home Minister Amit Shah-a’n Aizawl khawpui tan mel lung a rawn phun dawn tih a sawi a. Mita bawlhhlawh lut, mit timimtute an chhuak tur hi a lawmawm hle laiin party thenkhat erawh an lawm hauh lo a, a chhan chu mipui zawng zawng an lawm si a, chu chu an hlawkpui loh an hlau niin a sawi.
Kum 2018 MLA inthlan dawnah MNF chuan an manifestor number 11-naah Aizawl atanga sipai sawn chhuah tur tia an tar lan angin an manifesto chu an dinpui a, tihhlawh zel an tum tih a sawi.
“Pathian leh mipui zarah kan sorkar zel ang a, Pu Zoramthanga sorkar chuan sipai chhuahsan tur ram hi mi mal hnenah pek a tum lo hrim hrim a ni,” a ti.
Assam Rifles sawn chhuah chungchangah Congress party leh MNF duh dan a inang lo nia sawiin, December 1, 2005-ah The Zozam Times chanchinbu chuan ‘Mipui kutah AR ram hlan a nih loh nan MPCC chuan resolution a pass’ tih an tar lang a. August 7, 1995 khan Congress president hlui leh khatih laia chief minister-in ‘India ramah khawpui laili atanga sipai sawn chhuak ka la hre lo; chuvangin, ka huphurh a ni’ tih a sawi a. MNF chuan mipui kutah hlan an tum thu leh Congress-in mipui kuta hlan an hlau thung tih hun kal tawha an chetziain a tichiang niin Lalruatkima’n a sawi.
ZPM chu thereng nen tehkhinin Lalruatkima hian, “Thawm ring deuh an chhuah a, han man ila tak a nei lo, hmehsawm theihin a rawp vek. Ram hmangaihtu nia insawiin ZPM-te hi an aggressive em em a, lalna leh thuneihna chiah duhin an che buan buan mai a ni,” ti.
Congress chungchang pawh sawiin, “Delhi-a an pisapui, Akbar Road-a mite khu a lun tawh lo,” tiin, maimawm rilin a bawh nual tawh mai theih thu a sawi bawk.