New Orleans Pelicans in Zirtawpni zingah hnehna an chang a. NBA Playoffs khelhphak inbeiseina nei zelin Denver Nuggets lakah 107-88 in an chak.
Pelicans hian Ball Arena-ah Western Conference a hmahruaitu ni lai Nuggets hi an hmachhawn a. Denver in an star player Nikola Jokic chu hliam tenau a neih avanga an chhawr loh zanah huntha an neih an hmang tangkai.
Pelicans tan star player Brandon Ingram chuan point 31, rebound 11 leh assist 10 a nei a. Tun season-ah a vawi thumna atan triple-double a nei.
Jonas Valanciunas chuan point 15 leh rebound 12 la bawkin CJ McCollum chuan 23 a score bawk a. An chakna tura player langsar te niin tunhnaia an inkhel hnuhnung pasarih atanga vawi ruk an chakna a ni a. West-ah pasarihnaah awmin Play-In tournament khel thei tur zingah an la tel.
New Orleans coach Willie Green chuan, “Jokic a awm lohin an team a danglam hle tih kan hria a, mahse keini lamin offense leh defense a kan tih tur te kan hlen chu a pawimawh ber tih kan hre chiang.” tiin an chak chhan a sawi.
Inkhel dangah East a no.1 seed inchuhnaah Boston Celtics chuan 149-99 in Milwaukee Bucks an sawp a. Celtics tan Jayson Tatum chuan point 40 a score laiin Jaylen Brown chuan point 30 a score.