Wimbledon buatsaihtu All England Club chuan nikum atanga a kalpui Russian leh Belarusian tennis player-te inel ve a phal lohna chu a hlip.
All England Club hian heng player te hi an ram hminga infiammi ang ni lova, ‘neutral athlete’ anga an inziah luh dawn leh an tel theih dan tura tihte an zawm chuan an inel thei dawn tih an sawi.
AELTC hian he hremna hi Russia in Ukraine a run avang leh Belarus in a thlawp avangin a kalpui a ni.
Kumin Wimbledon hi July 3 hian khelh tan a ni ang.
AELTC chairman Ian Hewitt chuan, “Russia in dik lo taka Ukraine a runna hi kan dem a, Ukraine mipuite tawrhna hi kan hriatpui reng.”
“He thutlukna hi siam awlsam a ni lova, uluk takin kan ngaihtuah a, mi chi hrang hrang a nghawng turte pawh kan thlir tel vek.” tiin a sawi.
He thutlukna hian Wimbledon bakah Great Britain a tennis inelna buatsaih thin Queens Club inelna leh Eastbourne te pawh a huam vek dawn.
Heng ram infiammite hian Russia leh Belarus atangin sponsorship emaw tanpuina engmah an dawn a thiang lo bawk.