March thlaa khaw awm dan a mumal loh hle hnuah April atang hian India ram hmun tam tak chuan a nih dan thin pangngai aia lum a tawng hlawm dawn niin India Meteorological Department (IMD) chuan Inrinni khan a sawi.
IMD chuan India-a nipui lai, April leh June inkarah hian ram chhung hmun tam zawk chuan khaw lum thin dan pangngai aia lum an tawng hlawm dawn niin a sawi a. Hetih lai hian India hmarthlang leh chhim lama chengte chuan ni dang aia vawt an tawng ve dawn thung niin an sawi.
April leh June inkara khaw awm dan tur an thlirlawkna chu bulletin tichhuakin IMD chuan India laili, khawchhak leh chhimthlangte chuan heng hun chhung hian a nih dan thin pangngai aia lum an tawn dawn thu an tar lang a ni.
April thlaah hian state 10 chuan hetih hun laia a lum thin dan aia lum an tawng dawn niin weather office chuan a tar lang bawk.
IMD chuan hmarthlang, laili leh khawchhak lam tih loh India hmun dang zawng chuan a nih dan thin pangngai aia tlem ruah an dawng dawn niin a sawi bawk.
April thla bikah hian ram pumah ruahtui hi a tla thin pangngai zat a tla dawn niin IMD chuan a sawi a, “A nih pangngai leh a aia tamin ruah hi India hmarthlang, laili leh chhim lamah a tla dawn a. Hetih lai hian khawchhak leh hmarchhak bakah khawthlang tuipui kamte chuan an dawn thin ang an dawng phak dawn lo,” an ti bawk.
Khaw lum uchuak tak hi March thlaah khan sik leh sa awm dan a inthlak avangin a thleng nual a. IMD pawhin ram pumah a nih dan pangngai bakin a lum dawn niin an sawi lawk a ni.
Thla tir chawlhkar hnih kha a lum zual em em a, a hnu thla chanve hnu lam erawh khawthlang lam atanga thli vawt leh ruahtui pai tleh luh avangin a vawt thar leh a, kum 73 liam ta chhunga March thla a vawh ber tum 10 zingah a lang pha leh ta hial zawk a ni.