Formula 1 season kallai a intlansiak pathumna chu Australia-ah tlan a ni a. Intlansiak sawi hlawh leh vawi thum zet tihtawp lailawk rih ngaihnaah Red Bull car khalhtu Max Verstappen chu pakhatna a ni.
Melbourne khawpui a Albert Park Circuit a intlansiakah hian world champion ni lai hi Mercedes car khalhtu Lewis Hamilton chuan a dawt a, pathumnaah Aston Martin car khalhtu Fernando Alonso chu pathumna a nih dan a danglam deuh.
Intlansiak sawihlawh
Verstappen-a’n a hmasa ber atang tanin bul a tan tha chiah lo. Tun kartawp qualifying a tam tak beisei aia che tha Mercedes driver ten pahnihna leh pathumna atang bul tanin George Russell chuan pahnihna atangin Verstappen a pel nghal a, British driver in hma a hruai.
Nimahsela kual thumnaah Lance Stroll-a’n Charles Leclerc-a Ferrari a tai chhuak. Hei vang hian kawng thianfai a car lachhuak turin safety car an tir.
Lap 4-naah intlansiak chhunzawm leh a ni a, mahse lap hnih chauh hnuah Alex Albon a chesual a, safety car an kalpui leh a ni.
Hei hi remchangah la in hmahruaitu George Russell leh driver thenkhatten car ke thar vuah nan an hmang. Mahse an vanduai phahna a ni ta zawk.
Car ke an thlak hnu lawkah kawng tihfai tur a tam avangin ‘red flag’ kalpui a ni a. Car te chu pitlane-ah lut vekin intlansiak an chawl lailawk.
Team ten car tyre thar an vuah vek theih avangin car tlan chak ber neitu Red Bull tan huntha a inhawng. An tan leh hnu lawkah Verstappen-a’n hmahruaitu Lewis Hamilton a pel a, a tawp thlengin a hnung amiten an hnaih tak tak thei tawh lo.
Intlansiak tawp dawn lamah lap 58 tlan tura 56 an tlan laiin Kevin Magnussen-a’n bang a tai avangin a car nawrchhuah a ngai. Safety car tirhchhuah aiin intlansiak pangngai a an tawp theih nan an ‘red flag’ leh a, lap hnih an la tlan leh ang.
An tlan tan lehin car tyre a lo dai hman nen insu an awm nghal nual. Hei vang hian ‘red flag’ bawk a chhuak leh. Lap khat bak a awm tawh loh avangin safety car hnuaiah an tlan zo a, red flag hnuhnung ber chhuah hma a an kalpui dan angin intlansiak an titawp.
Ferrari driver Carlos Sainz chu Alonso nen an intai avangin sawi hlawh taka penalty pek a ni a. Palina atang 12-naah a tla thla a, a hnung ami zawngten vanneihna an chan phah.
Hnehna changtu Verstappen chuan, “Bul kan tan chhe thei hle a, ka tan chetsual a pawi avangin ka fimkhur zual a, ka nawr na ngam lo. Kan car a chak that avangin a danglamna erawh a hmuh theih nghal.” a ti.