India ramah darkar 24 liam ta chhungin Covid-19 kai hmuh chhuah chu a hma ni chiah aiin 28% zeta tam zawkin mi 3,824-in an kai tih finfiah a ni tih union health ministry-in a chhinchhiahnaah tar lan a ni.
Zirtawpniah khan India-ah hian Covid kai hi mi 3,095 hmuh chhuah niin Inrinni khan 2995 hmuh a ni bawk.
India-ah hian hri kai hmuh an pun leh deuh avangin enkawl lai pawh an pung leh hret hret a, enkawl lai 18,389 awm mekin a kai tawh zawng zawng, mi 4,47,22,605 atanga chhutin 0.04% an ni mek.
Enkawl dam tawh mi 4,41,73,335 awmin a kai zinga 98.77% chu an dam tawh tihna a ni a. Mi 5,30,881-in thihpui tawhin a kai zinga 1.19%-in an thihpui tihna a ni a ni.
Kum hnih liam ta, January 16, 2021 atanga invenna pek beihpui thlak kal mek zelah dose vaibelchhe 2.2 chuang pek tawh a ni a. Darkar 24 liam ta chhung khan dose 2,799 pek leh hman a ni bawk.
Tun hnaiah India-ah hian Covid kai hmuh zat hi a pung leh hret a, thuneitute pawhin an ngaihven leh tan a. Maharashtra leh Delhi bakah hmun hrang hrangah a pung zawngin a kal a, hetih rual hian thuneitute chuan chiaina tur a awm lo tih an sawi a, mipuite chu hmai tuam uluk thar leh turin an ngen thung.
March 22 khan Prime Minister Narendra Modi chuan Covid darh thar leh avang hian thuneitu sangte thutkhawmpuiin hmalak dan turte an ngaihtuah.