Aizawl : Hachhek bialtu MLA Lalrindika Ralte in a bial chhung Zawlnuam khuaa Mizo Cement Worker Association te’n an hnathawhna kawnga an zangkhai zawk nan cheng nuai khat leh sing nga man Cement Mixer a pe.
Lalrindika Ralte hian mipuite tana a thil tih chu MLA tlin leh nana ti a nih loh thu sawiin, “Bial mipui te’n an tana thawk tura min thlan vanga ti ka ni. Ka MLA nawn leh nan ka ti lo va, ka MLA chhunga a tha thei ang bera bial tana hnathawh hi ka tum ber a ni,” a ti.
Mizote hi huho nun chak tak an neih hi hman thiam leh zual a ngaih thu a sawi a. Mizoramah Congress party in Pathian leh mipuite zara sorkarna a chan chuan huho nun chakna hmangin Mizoram hmasawnna thlentir an tum thu sawiin, “Chung atana ram mipui mamawh intawm te chu Tang puihna hmangin kan thuam dawn a. Tuna Mizo Cement Worker te’n an mamawh intawm Cement Mixer hi a entirna a ni,” tiin, a bial chhung khaw hrang hrangah mipui mamawh intawm kalpui a tum thu a sawi bawk.
Lalrindika Ralte hian thla kal ta khan zirlai te leh a thawk tute mamawh Zawlnuam College-a hman tur mi 30 thut theihna bus a lo pe tawh bawk a ni.