Aizawl: Power & Electricity department-in kum 2023-24 atan kawlphetha hman man tihsan rawt mah se Mizoram leh Manipur electric bill man tur bithliahtu, Joint Electricity Regulatory Commission (JERC)-in a pawmsak lo va, bill tihsan a ni dawn rih lo.
Kawlphetha hman man hi kum tin ennawn thin a nih angin P&E department chuan kum 2023-24 atan kawlphetha hman man ennawna tuna hman lai mek atanga chhuta zaa 3.15-a tihsan a rawt a, hemi chungchang Mizoram State Advisory Committee-in an sawihona te, public hearing-a sorkar rawtna dodaltute thu leh technical thil hrang hrangte zirchian a nih hnuah kawlphetha hman man chu tisang lo tura thutlukna siam a ni ta a ni.
P&E department hian kum 2023-24 chhunga power supply enkawlna atana revenue sum mamawh Rs. vbc 782.33 bituksak turin commission an dil a, hemi zat hmuchhuak turin tuna tariff hman lai chu zaa 3.15-a tihsana sum mamawh tlin phaklohna awm chu Mizoram sorkarin subsidy Rs. vbc 157.90 emaw, commission-in ARR a bituksak atanga za-a 20.50 emaw, heta a tlem zawk zawk hian a phuhruksak dawn niin an sawi a. An dil ang chuan êng chhit man thar tur chu chawhrualin unit khat man Rs. 8.08 vel tur a ni.
JERC hian P&E deptt sum mamawhnate a zirchian hnuin ARR atan Rs. vbc 567.77 a bituksak a, hei hi kawlphetha hralhna atanga hmuhchuah tur a ni a, commission chhut danin tuna tariff hman lai hmangin leh electric vehicle (EV) charging station atana rate thar rawtna atangin kumthar 2023-24 hian Rs. vbc 406.85 leh kawlphetha hman bâng ram pawna hralhna atangin Rs. vbc 62.62 an hmuh theih beisei a ni.
Hei hi a vaiin Rs. vbc 469.47 a ni a, hei hian an sum mamawh chu phuhru zo dawn lo mah se, sorkarin Rs. vbc 98.30 subsidy pein a phuhruksak theih dawn avangin tariff tihsan a tul lovah a ngai ta a, P&E department chuan unit khat Rs. 7.94 vel zelin mipui hnenah a pe ang.