Aizawl: Nilainia Lunglei Municipal Council (LMC) inthlanna hmasa bera vote tlate chu vawiinah chhiar a ni dawn a, ruahmanna engkim peih fel a ni.
LMC inthlannaa Returning Officer Donny Lalruatsanga chuan vote chhiar tur hian a mawhphurtute an inpeih fel vek tawh thu a sawi a. Vawiin chawhma dar 10 atangin electronic voting machine-a vote tlate chhiar tan a ni ang.
Vote hi Saikuti Hall-ah counting hall pahnih siamin chhiar a ni ang a, hall pakhatah dawhkan 12 awmin dawhkan 24-ah chhiar a ni dawn a ni.
District Municipal Election Officer, Lunglei district Bawrhsap Ramdinliani chuan vote chhiar hna thawktu tur zawng zawng chu zing dar 9-ah counting hall thleng vek turin hriattirna a chhuah tawh a ni.
LMC inthlanah khan candidate 42-te awmin MNF, ZPM leh Congress party-te chuan ward awm zawng zawng an chuh kim vek a. BJP-in ward kuaah candidate a nei thung.