Premier League champion lai Manchester City in hmahruaitu ni lai Arsenal an um chhunzawm a, striker rinrawl Erling Haaland tel lo pawhin an tha hle tih lantirin Liverpool an nghaisa hneh hle.
Etihad Stadium a Inrinni tlai a inkhelah hian City in goal 42 khung tawh striker chhawr thei lo mahse Liverpool hi 4-1 in an hneh tho.
Jurgen Klopp-a pawlte hi tunhnai season engemaw zah chhung Pep Guardiola pawlte elpui hlun zing ami an ni a. Nimahsela tun tum inkhelah erawh City nen an inkar a zau tih a hmuh theih.
Minute 17-naah Liverpool in counter-attack atangin goal an khung hmasa a, Diogo Jota thawhrah atangin Mohamed Salah chuan goal a khung.
Mahse City an ngawi rei lo. Goal an chhuah hnuah a kheltha zawk niin minute 27-naah Jack Grealist chuan Julian Alvarez goal khung tur a siamsak a. Grealish hian Liverpool goal khung nawn tur a lo veng tawh bawk.
Second half tan atanga second 53 a liam lehin Alvarez chu goal siamtu ah tang ve zawkin Riyad Mahrez ball tha a pe a, ani in Kevin de Bruyne goal khung tur a siamsak.
John Stones-a’n midfield leh defence line inkarah khelin City in inkhel an thunun theih chhan a ni a, minute 53-naah City in inkhel dahtha in Ilkay Gundogan hmangin goal an khung leh a. Huntawp hma in kheltha tak Grealish chuan a phu ang ngeiin goal a khung leh bawk.
Inkhel zawh lam
Manchester City manager Pep Guardiola chuan, “A tir atanga minute 93-na thleng khan duhthusam inkhel ang tluk a ni. 1-0 a hniam zawk kan nih laia, Jack-a’n goal ngei tur a dan te pawh ngai mahse kan khelhdan kha a tha.”
“Kan inkhelh dan, hmunawl kan zawn dan, kan inpekna leh thawhrimnate kha a tha em em vek.” a ti a.
“Arsenal kan um a, anni hi tuan an dinhmun awmna angah hian an awm fo ngai lo. Liverpool pawh hi nikumah pali a champion an ni teuh a, tun ang hi an ni reng lo. Hei vang hian kan tan pawh awlsam lo mahse hlawhtling turin kan bei dawn.” a ti.
Liverpool boss Jurgen Klopp chuan, “First half a kan inkhel kha helai hmuna kan inkhelh fo thin dan niin ka hria. City hian ball an chang hnem thin a, mahse kan talbuai lova, an tan pawh harsatna kan siam fo.”
“Kan goal chhuahte erawh pawm a har deuh. An tan kan ti awlsam lutuk a, khang kha Man City lakah chuan a thiang lo.” a ti ve bawk.
Gabi a lo kir e
Arsenal in tlak hlauhawm a awm Leeds United an hmachhawn a, inkhel hautak ni thei turah hahdam takin hnehna an chang a. October thla hnua goal la khung leh lo striker Gabriel Jesus chuan goal hnih a khung zanah 4-1 in an chak.
Emirates Stadium a inkhel an tan hma in Man City an chak avangin Arsenal in point 8 a hma an hruaina chu tih nun leh an mamawh tih an inhria. Minute 35-naah hma an hruai a, Luke Ayling chuan Jesus lakah penalty chawiin an goal hmahruai ni turin Jesus-a’n a khung.
Leeds an khel chhe bik lo, goal hlauhawm an nei nual a. Aaron Ramsdale-a’n Rasmus Kristensen, Crysencio Summerville leh Jack Harrison te lakah save a nei vek.
Mahse second half tan tirah Arsenal in goal an khung nawn leh. Gabriel Martinelli ball cross chu Ben White chuan an goal hnihna atan a khung a. Hemi hnuah hi chuan Arsenal an chungnung tawh.
Minute 55-naah Leandro Trossard ball cross chu Jesus-a’n an goal thumna ni turin a khung a. Leeds United in Kristensen hmangin goal khat khung ve mahse huntawp hma in Granit Xhaka chuan an goal hnuhnung ber a tauh lut.
An tlawm avangin Javi Gracia pawlte hian point khat chauhin relegation zone an hlat mek.
“Kan tan inkhelh an ti awlsam lo hle. Hmun pawimawh a ball hloh kan nei leh thin a, player tlan chak pali an nei a, rang taka innawr ah an tha hle. Mahse inkhel kan thunun theih hnuah erawh goal ven leh nawrah kan ti tha viau.” tiin Arsenal boss Mikel Arteta chuan a sawi.
Blues an tlawm
Chelsea chu 11-naah an tla thla a, Aston Villa in an mualah 2-0 a rawn hnehin Graham Potter-a pawlte an la che fuh thei lo.
Stamford Bridge-ah Unai Emery pawlte hian minute 18-naah Ollie Watkins hmangin goal an khung a. Chelsea defender Marc Cucurella a chesual.
Second half-ah John McGinn chuan Villa goal hnihna mawi tak maiin a khung a. Chelsea in vawi tam goal nawr mahse an khung thei lova, counter-attack-ah an tlarhnung a ngheh tawk lohna chu Villa in an hmu fuh leh thin.