Kum 2019-a a thu sawinaah mi a tihmingchhia tia puh vanga tun hnaia thiam loh chantir, kum hnih tang tura hrem leh MP a nihna atanga bân tak, Congress hruaitu, Rahul Gandhi chuan a chunga court thutlukna chu Thawhtanni hian Surat sessions court-ah ngaihtuah nawn (appeal) a tum nia sawi a ni.
Congress president hlui hian sessions court-ah hian a appeal dawn bakah magistrate-in a hremna chu tihkhawtlai rih a dil nghal dawn nia sawi a ni.
Gandhi-a hi hrem a nih rual khan ni 30 chhung bail-in a chhuah nghal a, hetih hun chhung hian a appeal theihna hun hawnsak a ni bawk a; mahse, Lok Sabha secretariat chuan kum hnih tang tura hrem a nih tlin miau avangin MP a nihna erawh a hnawlsak a. Eptu hruaitute chuan ‘rel tlan chak chi’ ang maia ranga a chunga hma lak a ni zung zung chu a chhan an zawt hial a ni.
Gandhi-a hremna hi court sang zawkin lo tikhawtlai pawh ni se Election Commission chuan a bial lo vawn thin, Wayanad Lok Sabha bial vawngtu tur thlan a buatsaih a tul dawn tawh tho va. Tuna a dinhmunah hi chuan kum riat chhung inthlan a chuh thei dawn lo a ni.
MP atanga paih a nih tuk lawkah Gandhi-a hi Delhi-a sorkar ina a chenna, bungalow chu chhuahsan tura hriattirna a dawng zui nghal bawk.
Congress chuan a chunga chet dan hrang hrang awmte hi Gandhi-a’n parliament-a Prime Minister Narendra Modi-a hnena industrialist Gautam Adani nena an inzawm dan sawi fiah tura a zawh avangin ‘ngawi tura an phirhna’ niin an sawi.
Tun hnaiah Adani sumdawnna chungchang hian sawi a hlawh hle a, US-a short seller Hindenburg Research chuan he sumdawng inthlungkual lian tak hian sum an hman leh chhek danah dik tawk lo a awm niin an lo puh tawh a ni.
BJP chuan Gandhi-a laka chet dan hrang hrang hi dan ang thlak a nih thu sawiin, Gandhi-a chu dan chunga leng anga a inngai niin an sawi a. Gandhi-a chuan a thu sawi danah khan OBC-te a hmusit niin an sawi bawk a, an OBC minister neihte kaihhruaiin Gandhi-a thu sawi duh lohna campaign an thlak bawk.
Union Home Minister Amit Shah pawhin eptute auhla chu a dik lo tih sawiin, Gandhi-a chuan court-in a hrem avangin politician a nihna chauh ni lovin ram rorel khawla member a nihna pawh a hloh tel tih a sawi a. A chunga thil thlengah prime minister bei chiam chiam lovin thubuai chu court sang zawkah thlen mai se a ti bawk.
“An hremna appeal lovin a awm mai mai a, hetianga luhluh hi eng nge ni ngai? Tih dan hran bik i mamawh em ni? MP nih zel i duh a, court-ah i kal duh si lo maw?” tiin a sawi.
Congress hian BJP leh Prime Minister Modi-a chuan hna lian thawk turin an duhsak zawng sumdawngte an thawhpui mai thin niin an sawi a, rorel lai party erawh chuan an pha nasa hle.
Gandhi-a hrem a nih avang hian eptu party hrang hrangte chu tangrualin BJP kaihhruai sorkar laipuiin an hnuaia investigative agency-te chu anmahni eptute beih nan leh an laka phuba lak nan an hmang nasa niin an sawi a, sorkar an beih nasat phah hle.
Mi thiamte chuan Gandhi-a an hremna, Indian Penal Code Section 499 hmanga mi tihhmingchhiat vanga kum hnih intantir hi a thleng khât hle niin an sawi.