Tripura chuan India-in G20 meeting a thlen kal zel peng pakhat, ni hnih awh tur science conclave, ‘Clean Energy for a Green Future’ chu Thawhtanni atang hian a thleng dawn tih Inrinni khan thuneituten an puang.
April 3 & 4-a hun hman tur hi an state khawpui, Agartala-a International Fair Ground-ah neih a ni ang.
“He hun hi kan state-in hausakna leh resouce kan neih hrang hrangte khawvel hmuha kan pho chhuahna hun tha a ni dawn,” tiin Inrinnia West Tripura district, Badharghat-a hun a hmanaah Chief Minister Manik Shah chuan a sawi.
Pathianni khan ram hrang atanga conclave chhimtu tur mi 85 vel chuan Agartala hi an thleng a. “Bangladesh aiawh pawh sawm bik an nih angin an rawn tel dawn a ni,” tiin industries & commerce special secretary Abhishek Chandra chuan Inrinnia thuthar lakhawmtuten an kawmnaah a sawi.
Chandra chuan ni hnih awha hun hman hi session riat velah thenin thupui hrang hrang ngaihthlak leh thlir a ni dawn tih a sawi a. G20 palaite hi an state-ah Pathianni atanga Nilaini thleng an châm dawn tih a sawi bawk.
Agartala-a an châm chhung hian palaite hian khualzinte tlawh thin hmun hrang hrang – Albert Ekka Park, Oxygen Park, Purbasha, Sepahijala Wildlife Sanctuary leh Neermahal Palace te an tlawh dawn tih a sawi.
Agartala hi India-in G20 meeting hrang hrang a thlen mek leh thlen turah a thlengtu tur khawpui 65 chhawpchhuah zinga pakhat a ni.
Conclave a thlen dawn avangin state sorkar pawhin nasa taka hma lain beihpui a thlak nasa hle a. Heng zingah hian Albert Ekka Park, Ujjayanta Palace (sorkar museum) leh Neermahal (Rajasthan-a Jal Mahal dawta water palace ni leh hmasa ber) bakah hmun dang dang pawh a chei thain a thuam nasa hle.
Inrinni pawh khan chief minister chuan Lake Palace hi tlawhin laser light leh sound show a hawng a ni.
“Tripura-a khualzinten an tlawh thin zinga pawimawh tak pakhat, Neermahal chu G20 palaite lo dawl turin a inpeih tawh,” tiin Shah chuan Twitter-ah a tar lang nghe nghe.
Chief minister hian G20 palaite hi Pathiannia Agartala an thlen hnu lawkah a kawm nghal a, an state art, culture, heritage leh sumdawnna remchang awm theihte tar lanna exhibition a hawng nghal bawk.
India hi G20 (Group of 20) president ni mekin he nihna hi kum khat chhung atan, December 1, 2022 khan a chelh tan a ni.
G20 an tih ramte hi Argentina, Australia, Brazil, Canada, China, France, Germany, India, Indonesia, Italy, Japan, Republic of Korea, Mexico, Russia, Saudi Arabia, South Africa, Turkey, UK, US leh European Union (EU) te an ni.