United States chhim leh ram laili thlang lam chu tornado-in nasa takin a nuai a, khawpui leh khaw tam takah chhiatna nasa tak thlenin mi 26 vel an thi.
State tam takah chenna in tam tak a chhia a, mi tam takin power an nei lo bawk.
Washington Post chuan tornado 60 chuang a thawk niin a tar lang.
Arkansas, Tennessee, Illinois, Indiana, Alabama leh Mississippi state-ah te thi an awm.
Arkansas-a Wynne khua phei chu a tichhe vek a ni.
Ashley Macmillan chuan tornado a thawh lai hian a pasal fanaute leh an uite nen bual in chep takah an inhnawh a, ‘tawngtaiin kan inmangtha a, kan thi ngei dawn niin kan inngai vek’ tiin a sawi.
Thing tluin an in a tichhe nasa hle a; mahse, anmahni chu an him hlauh a ni.
AP news agency hnenah, “Kan in chu a sawi dawt dawt niin kan hria a, thawm ring tak tak te, bungbel tla ri te kan hria,” a ti.
Governor Sarah Huckabee Sanders chuan Zirtawpni khan Arkansas-ah hian emergency a puang a, national guard-in chhawmdawl hna an thawk zui mek.
President Joe Biden-a biain an dinhmun a hrilh tih a sawi a, ani pawhin puih a intiam tih a sawi bawk.
Zirtawpnia thlipui vir chi thawk hian Illinois state-a Belvidere-a heavy metal concert an neihna hmun theater chung a la a, mi pakhat thiin mi dang 28-in hliam an tuar.
Thlipui hi khawchhak lam pana kal zel a ni a, mi sang tam takin power an neih loh phah.
Virginia, Ohio leh Pennsylvania te chu nei lo an tam zualna niin US PowerOutage website chuan a tar lang.
Storm Prediction Center-in bulletin an tihchhuahah chuan tornado-te hian kawng thui tak a la zawh dawn niin an sawi bawk.
Kawng thui tak zawh chi tornado hi chawlhkar zawnin a thawk khât hle a, thli vir thawk avang hian Mississippi-ah mi 26 an lo thi tawh.
Kar hmasaa Mississippi tornado kha km 94 zet kawng zawh niin darkar khat leh minute 10 vel a thawk a. Chenna in 2,000 chuang a tichhia niin thuneituten an sawi.
President Biden chuan he state hi Zirtawpni khan a tlawh nghe nghe.