BJP chuan court-a a thubuai ngaihtuah tha leh tura ngenna a thehluhnaah mi tam takin a inzuitir dul dul chu a naupang chhia hle nia sawiin, court rorelna nek (pressure pek) tum vang mai maiah an puh.
Surat khawpuiah hian Gandhi-a hi a farnu leh an party hruaitu tam tak bakah party mi leh sa tam tak an inhawr khawm a ni.
“Rahul Gandhi-a hi appeal thehlut turin a kal thei ngei a. Thiam loh chantira hremna pek hian appeal thehlut tura amah a kal kher pawh a ngai chuang hek lo. Tih dan tlangpuiah hetianga hremna pek hi an inlan ngai lo. Ani chu amah ngei kalin an hruaitu dangte leh mi tam takin an tawiawm a, a lemchanna thil hle,” tiin Law Minister Kiren Rijiju chuan Twitter-ah a tar lang.
“Rahul Gandhi-a hi naupang chhia taka chein court chu pressure pek a tum a. Kan rama court zawng zawng hian hetiang laka inven hi chu an thiam vek,” tiin a tar lang bawk.
Congress party eawh chuan an hruaituten Surat-a Gandhi-a an tawiawm teuh hi ‘chakna lantirna’ a nih loh thu leh Gandhi-a ‘an thlawpna tihlanna’ a nih zawk thu an sawi ve thung.
“Chakzia pho lanna a ni lo. Ram tan a bei a, a thil beihah hian kan thlawpzia lantir nan a rualin kan kal a ni zawk,” tiin party chief Mallikarjun Kharge chuan a sawi.
An party chuan ‘dan lova man’ an hruaitu leh an worker-te man an nih lohna turin ruahmanna an siam niin a sawi bawk.
“Dan lovin Gujarat-ah hiana BJP sorkar chuan Congress hruaitu leh worker-ten Surat an kal theih loh nan chet an tum tih pawh kan hria a ni,” tiin an hruaitu, Jairam Ramesh chuan Hindi-in Twitter-ah a tar lang.