Aizawl : Aizawl Zoological Park (Aizawl Sahuan)-a dah tur Sakei (Royal Bengal Tiger) pahnih lak belh a ni.
Aizawl Sahuanah hian Sakei pahnih hi Nandankanan Zoological Park atanga lak niin, sakei la tur hian Aizawl atangin March 21, 2023 khan Aizawl Zoological Park Range Officer Immanuel-a leh Vety office Dr Rosangzuali Chhakchhuak te kaihhruaiin mi paruk an kal a, March 24, 2023 khan Bhubaneswar thlengin sakei phurhna tur engkim ruahman fel vek hnuah Nandankanan Zoological Park chhuahsanin, March 31, 2023 khan Aizawl Zoological park thlenpui a ni.
Sakei lak tharte hi hun eng emaw chen chu dah hran an ni rih dawn a, mipui en theih tura phochhuah thuai tum a ni a, a hun tur tak erawh hriat theih a la ni rih lo.
Tun tuma sakei lak tharte hi a nu leh a pa a ni a, a pa hi a hming Kundan niin, a nu hi Adyasha a ni ve thung. Inthlah pung thei tura beisei an ni.
Heti hian tun dinhmunah Aizawl Zoological Park-ah hian sakei pathum an awm ta a ni.