India chuan a ram chhung hmarchhak, Arunachal Pradesh-a hmun hmingte China-in thlak a tum chu na takin a dodal.
Foreign ministry thupuangtu, Arindam Bagchi chuan he state hi ‘India ram chhung leh lak hran theih loh’ a nih thu Thawhlehni khan a sawi.
China hian Himalaya tlangdunga awm, India nena an inrina state-a hmun 11 hming chu thlak a tum nia sawi a ni a. Beijing chuan he thil inmung chungchangah hian sawi a la nei lo.
China leh India hi Line of Actual Control, (LAC) an tih ramri, km 3,440 zeta thuiin inriin ramri hi a buai hle a. Lui, dil leh vurin a khuh tlangte awmna ram a nih avangin a chiang lo.
China hian Arunachal Pradesh pum hi a ram nia chhalin ‘South Tibet’ tiin a sawi mai thin bawk.
Khawvela sipai ngah ber ram pahnihte hi ramri-a hmun eng emaw zatah an lo inpe fo tawh thin a, December maiah pawh khan ramri khua, Tawang-ah an inep.
Tun tum hi Beijing-in India state-a hmun hmun a thlak tum vawi khatna a ni lo va, a hmaa a tum pawhin India a lo thinrim hle tawh.
Tun tumah hian Chinese Ministry of Civil Affairs chuan April 1 khan ‘Tibet chhim lama hmun thenkhat hming chu tihdanglam’ tiin a puang a, hemi atang hian boruak a awm a ni.
Tlang, mihring chenna, lui leh khua, state khawpui, Itanagar atanga hla lo takte pawh thlak a tum zingah a tel.
India chuan Beijing hian hmarchhak state-a hmunte khawih theihna engmah a nei lo tih a sawi.
“Tun hi China-in hetianga tih a tum vawi khatna a ni lo va, na takin kan hnawl a ni,” tiin Bagchi chuan a sawi.
“Arunachal Pradesh hi India chhung, a peng pakhat a ni a. Hmun hming thlak tumna hi a taka thleng thei a ni lo,” a ti.
Beijing hian kum 2017 khan Arunachal Pradesh-a district paruk hming thlak a lo tum tawh a, hei hi Dalai Lama-a’n a tlawh ‘thungrulhna’ nia ngaih a ni a. Tibetan thlaram lam hruaitu hian hemi hma lawk hian hmarchhak state hi a tlawh a ni.
Nikum December khan hmun 15 hming thlak tur a puang leh a, hei pawh hi India-in a lo hnawlsak tawh bawk.