Huntawp dawnah Everton centre-half Michael Keane chuan goal mawi a khung a. Premier League inkhelah Tottenham Hotspur chak tur chu lo dal phahin 1-1 in an inhnehtawk.
Thawhtanni zana Goodison Park a inkhel hi boruak a tang a, tlak hlauhawm a la awm pha Everton in manager ban hlim Spurs an mikhual. Chak mamawh team ve ve inkhelah hian red card vawi hnih phawrh a ni a, player 10 ve ve in team ten inkhel an zo.
Minute 90-naah Keane-a’n yard 25 a hla atangin an si phurh sutna a hlap lut a, relegation zone an chhuahsan theih phah. Spurs hian minute 68-naah goal an khung a, Keane-a penalty chawi niin Harry Kane-a’n goal-ah a khung.
MInute 57-naah Toffees midfielder Abdoulaye Doucoure chuan Kane-a hmaiah a nam avangin red card a hmu a. Referee thutlukna dik nimahsela England captain Kane hian Doucoure nen an inchhilh hma in foul a nei ve thova, a tlu der nia a lan bawk avangin sawizui a hlawh hle.
Huntawp dawnah Spurs substitute Lucas Moura chu hnawhchhuah a ni ve bawk.
Inkhel zawhah Tottenham interim manager Cristian Stellini chuan, “Red card a thlen hnuah pawh inkhel kha kan thunun thei lo. Ball chang hnem zawk tur tal kan ni.” tiin hmasawn an ngaih thu inkhel zawhah a sawi.