Lunglei Municipal Council (LMC) chairman atan Ward No III atanga thlan tlin, Lalzuithanga ruat a ni a, vice chairman atan Ward No VII atanga thlan tlin, K Lalrinawma ruat a ni bawk.
Thawhlehni khan ZPM Gen Hqrs. hotute kaihhruainain ZPM Southern Headquarters, Lunglei-ah LMC inthlan neih zawh taka councillor thlan tlin takten LMC sorkar kalpui dan tur relin an thukhawm a, mawhphurhna chelh tur thenkhat an ruat zingah chairman tur leh chairman turte an ruat a. Executive member tur erawh an la ruat fel lo thung.
He hunah thu sawiin ZPM General Hqrs. President, Lalliansawta chuan, “ZPM party-in record thar danglam tak, eptu awm miah lohna LMC sorkar kan siam thei hi a ropui hle a, heti ang thil hi Mizoram mai ni lo, khawvel huap pawh a thil thleng zen zen ngai lo a ni,” a ti.
Lalliansawta chuan eptute hi rorelna khalh ngil tura dinhmun pawimawh tak chelhtu ni mah se, eptu tel lova ngil taka an kal theih a rin thu a sawi a. Lunglei mipuiten an chungah rinna nghatin duh takin an thlang tling tih hre tur leh, mipui duh dan ang taka hnathawh kawr ha tur leh, rilru sang tak pu chunga Lunglei khawpui enkawl tura an beisei thu a sawi.
ZPM Working President K Sapdanga pawhin an beisei ruk an rin ngam si loh hlawhtlinna an chang chu awm dan thiam pawh a har tih sawiin, “LMC-ah hian executive councillor post a tam thei ber min pe turin state sorkarah kan dil a, tunah hian kan nghak mek a ni. Danah chuan pathum aia tam tur a ni lo tih a ni a, engzat nge min pek dawn kan la hre lo va, chumi avang chuan executive councillor hi lo ruat lawk theih ngawt a ni lo,” a ti.
ZPM sorkarna hnuaiah ni se chuan executive councillor-te hi a tam thei ang ber pek theih a chakawm tih sawiin K Sapdanga hian, LMC inthlanah hian tawp mai lovin, state-ah sorkar siam tura tun atanga mi tangkai tak ni tura an inbuatsaih a tul thu a sawi bawk.
ZPM Gen Hqrs General Secretary Phairothanga kaihhruai inkhawmah hian Vice President Dr. Kenneth Chawngliana, Treasurer C. Laltanpuia te pawhin thu a sawi bakah councillor tharte lawmpuina thu ziak a hlan a. Councillor thlan tharte aiawhin Lalzuithanga’n thu a sawi a ni.