Aizawl : Thawhtannia Lunglei Municipal Council inthlan result puan a nih hnuah an pisa-ah MNF in chhung inkhawm an nei a, he hunah MNF Adviser Lalruatkima’n thu sawiin, “MNF chuan kan chak lohna kan pawm a, insiam that nan kan hmang ang. Chakna chang ta ZPM te kan lawmpui a ni,” a ti.
Lalruatkima chuan LMC inthlan chu an inenletna tur hmahruai a ni tih an hotute’n an hria a, ngaihtuahna an hman dawn tih sawiin, “Lunglei mipuiin duhthlanna thiang takin vote an thlak a. Result tha tak neitu ZPM-te MNF party chuan kan lawmpui tak zet a, Lunglei hmasawnna atan theih tawp an chhuah ang tih ka ring,” tiin, LMC member-te’n an mamawhte inthlahrung hauh lovin state sorkar-ah thlen zel turin a chah.
MNF sorkar chuan Lunglei hmasawnna atan tawngka mai ni lo, a tak ngeiin an thawk zel dawn tih sawiin MNF Adviser chuan, “Campaign kharnaah khan ka sawi tawh a. Lunglei mipuite chungah thupha ka chawi nawn leh duh a. He sorkar hian kawng hrang hrangin Lunglei mipuite rilru kan tinain an duhkhawp kan tling lo tih kan hria a. Ngaihtuahna thar nen hma thar kan la dawn a ni,” a ti.
LMC inthlan neih zawh taka MNF party aiawha candidate zawng zawngte, MNF block, Unit leh Sub Hqrs, bakah inthlan buaipuitu official te, vote thlak tute chungah lawmthu a sawi bawk.