Aizawl: Serchhip district election officer, district magistrate, bawrhsap ni bawk Kumar Abhishek-a’n Serchhip bial bye-election lo awm tur chungchangah Inrinni thleng khan model code of conduct bawhchhiatna liantham a la awm lo niin a sawi.
Inthlan that lo awm tur chungchangah thuthar thehdarhtute kawmin he thu hi Inrinni khan Serchhip district election officer chuan a sawi a. Bye-election atana inbuatsaihna a kaltluan thu leh inthlang tura an inpeih tawh thu a sawi.
Kumar Abhishek chuan Covid-19 laka himna tura Election Commission of India (ECI) leh state sorkar ruahmannate tha taka kalpui a nih tur thu a sawi a. Polling party-te chu Covid-19 invenna hmanraw tulte pek an nih tur thu leh vote thlaktu mipuite kut silna tur (sanitizer) chhawp a nih tur thu te, voter kum 80 chung lam te, pianphunga rualbanlo te, Covid-19 hri kai enkawl mek leh quarantine lai ten postal ballot hmanga vote an thlak theihna tur ruahman a nih tur thu a sawi.
Serchhip bial bye-election lo awm turah polling station 29-ah mipuiten vote an thlak dawn tih Serchhip district election officer chuan a sawi a. Serchhip bialah vote nei mi 19,718 an awm mek thu leh heng zinga 19,520 chu general voter an nih thu a sawi a. General voter zinga 9,191 chu mipa an nih thu leh hmeichhia 10,329 an nih thu sawiin, service voter 198 awm zinga pahnih chu hmeichhia an nih thu a sawi.
Serchhip SP Stephen Lalrinawma pawhin dan leh thupek kenkawh kawnga police hmalak dan tlangpui sawiin, polling station tinah police pahnih dah an nih tur thu a sawi a. Special drive an neih mek thu leh Serchhip bial chhungah check post siam belh a nih tur thute, hmalakna pawimawh dangte a sawi bawk.