An coach an ban hnuah Chelsea coach thar ni tur inrinsiakna boruak a lian nghal hle a. Europe chanchinbu thenkhatte chuan Blues hian an club enkawl tur hian manager panga atanga pasarih vel an bûk mek niin an sawi.
Pathianni zanah Blues hian thla sarih pawh an inchhawr tlin hma in Potter hi an ban a. Todd Boehly leh Clearlake Capital in club an lei hnua an manager lakluh hmasak berin a daih rei lova, Blues hi Premier League table chanve hnuai lamah an awm.
Hmun thenkhata an sawi danin Bayern Munich coach ban tan Julian Nagelsmann chu a hming a ri ring hle. Hetihrual hian club lam hian Mauricio Pochettino leh Luis Enrique te pawh an be dawn niin an sawi bawk a. Blues hian an manager ni thei tura an tinzawn ho zawng zawng hi inbiakna an la neihpui lo bawk.
Tute nge langsar?
Manager club enkawl lai nei lova awm hming langsar an awm nual a. Hengte hi Blues nen sawizawm an ni nghal thuai. Anni ang thovin Tottenham pawhin manager thar ni tur an zawn ve avangin English club pahnihte nena inchuhna pawh thleng thei a ni.
Kum 35 mi Nagelsmann hian kum sarih manager hna a thawh chhungin a vawikhatna atan club vawnlai nei lovin a awm mek a. Hoffenheim leh RB Leipzig te pawh lo enkawl tawh hi kum 2018 khan Real Madrid chuan an manager nghet ni turin an ngaihven uluk viau a, amah zawk hian Spain lam pan loh a thlang ta zawk.
German coach hi Tottenham pawhin an duh ber ni tura ngai an tam a, nimahsela Stamford Bridge lam hi a tan kal chakawmna a ni zawk dawn nia ngaihna a lian.
Hetihlai hian kum lamah a la naupanna chu club lama mi thenkhatin an iai phah thei niin an sawi ve bawk.
Premier League a hna thawk tawh Pochettino hming a ri ring leh bawk. Kum 51 mi hian Tottenham chu Champions League final a luhpui tawh a, a club hlui nen sawizawm nimahsela Spurs hian an ban tawh miau a, hei vang hian club hotu lam nen an inkar eng ang tak nge tih hriat a ni lo. Blues lam tan pawh duhthlan tur lian tak a ni.
Kum 52 mi Luis Enrique hi Barcelona manager a nih chhunga ‘treble’ leh ‘double’ champion nihpui thei a ni. nikum khan World Cup zawhah Spain coach a nihna a chhuahsan a, amah hian England a hnathawh a chak thu a sawi bawk. Nimahsela club nazawng a hnathawh kher a tum lo tih a sawi tel.
Zinedine Zidane leh Antonio Conte te hming pawh a ri a, nimahsela anni erawh an dinhmun a dang deuh.
French legend hi Real Madrid-ah hlawhtling hle mahse a hnathawh lehna tur hi inrinsiak a ni fova, club thar neih a hmanhmawh lo. Chutihrualin hlawhtlinna a neih theihna tur a nih chuan club lian pan a tan a chakawm ang.
Italian coach Conte hi Chelsea-ah hlawhtling tawh mahse club in rawih nawn an ngam ang em tiin zawhna a awm ve bawk.