Aizawl : Aizawl West III bialtu MLA VL Zaithanzama’n “ZPM thlipui a tleh a, a la tleh na zual zel dawn” tiin, “Ram mipuiin sorkar tha an duh a, keini hi min beisei avangin he rama Pathian thil tum a hlawhtlin theih nan min hmang thei a ni” a ti.
ZPM Aizawl West III block conference, Bungkawn Vengthar YMA hall-a a hmanpuinaah he thu hi nimin khan VL Zaithanzama chuan a sawi a. “Mizo ten mi ram kan awt thin a, duh thu kan sam thin, ram inrelbawlna a fuh loh chuan mipuiin kan tuar thin, ram hmai tibaltute hi ruk hmang te, nawhchizuar te an ni lova, ram enkawltute an ni zawk thin” a ti.
VL Zaithanzama chuan “Lei dawh a chim emaw, ruihhlo a hluar emaw hian mipui mawh a ni lova, sorkar mawh a ni” a ti a. Mizoramin sorkar tha a mamawh tih sawiin, chumi din tum chuan hma lamah ke an pen zel niin a sawi bawk.
He hun hmanpuitu dang ZPM PAC member TBC Lalvenchhunga pawhin Lunglei Municipal Council inthlana an hlawhtlinna chu thawhrimna rah leh Pathian malsawmna a nih thu a sawi a. “Mip- uiin min beisei sang em em a, eiruk do kawngah kan intiam anga kan tih theih loh chuan kei ngei pawh hi ZPM-ah ka tel zui zel a tul lovang” tiin, ZPM ticket-a thlan tlin MLA, Municipal Corporator leh Councillor te chu huaisen leh dik taka an kal theihna tura an hnungah mipuite dik taka an din ngam a pawimawh thu a sawi bawk a ni.