India-a eptu political party 14 zetin Prime Minister Narendra Modi-a sorkarin thuneihna an hmang sual a, an hnuaia investigating agency-te chu politics-a an epte tihhlauh nana hmanga an puhna thu Supreme Court-a an thehluh chu hnawl a ni.
Petition hi advocate hlun tak, Abhishek Manu Singhvi-a’n eptu party-te aiawhin a thehlut a, kum 2014-a Modi-a’n thuneihna a chan atangin Enforcement Directorate (ED) leh Central Bureau of Investigation (CBI)-ten eptu hruaitute laka thubuai an siam chu a pung nasa hle niin a tar lang.
Thu thehluh a ngaihtuahnaah Chief Justice of India DY Chandrachud chuan Singhvi hnenah hian eptu party-te hian chhuina leh an chungthu relsak an nih loh nana an him dan leh a ngaihtuah tel em tih a zawt a, khua leh tui ve tho an nih avangin dikna chanvo hran an nei bik em tih a zawt bawk.
Singhvi chuan eptu hruaitute hum bik emaw, hrem an ngaihnaa hrem loh bik emaw a dil lo tih a sawi a, dan chu a nihna ang taka hman leh kalpui mai a dil tih a sawi.
Sorkar chuan a agency-te chu eptute tihchak loh nana hmangin, mipui rorelna kalhmang pel leh dan pelin a chelek niin a sawi bawk.
Singhvi hian sorkar chuan rinhlelh man dawna Supreme Court-in zam tur a tih pathum, ‘triple test’ pawh a palzam niin a sawi a. Eptu hruaitu tam tak chu finfiahna pawh awm lovin man an ni tih a sawi a, hei hian mipui thlan an nih anga an tih tur an tih theih loh phah niin a sawi.
Chief Justice erawh chuan Singhvi thil sawite chu politician tan chauh a ni a, mi dang, ei ru leh pawi khawih dang a huam ve lo nia sawiin a kimchang lo tiin a hnial a ni.
Supreme Court chuan politician tan bik dan a zawm thei lo tih a sawi a, court-ah chuan mi mal thubuai ang vekin thil kalpui a nih thu leh a tul a tih chuan Singhvi-a chu parliament-ah au chhuak zawk turin a ti.
Singhvi-a hian a thu thlen chu a hnuk kir nghal a; mahse, tanfung tha zawk nen a inlan leh tur thu a sawi thung.