Donald Trump chu kum 2016 inthlan dawnah khan thil pawimawh tak tak thup nan sum a hmang nual nia puh a ni mek a, hengah hian ‘engmah tih dik loh’ a nei lo tih a sawi rualin, ‘US chu hremhmun lam panin a kal mek’ tiin a sawi.
President hi Thawhlehni khan sualna rawva tak tak 34 lai tia puh niin Manhattan court-ah a inlan.
An puhna zingah hian a ka hup nana puitling film-a chang thin, Stormy Daniels hnena pawisa pea puhna pawh a tel a, ani hian Trump-a nen hian mipat hmeichhiatnaah an fihlim lo dun niin a sawi.
Trump-a hi US president zinga dan bawhchhia leh pawikhawih vanga a chungthu rel hmasak ber a ni.
“Pawi ka khawih awmchhun chu hlauh nei lova he ram tihchhiat tumtute ka beihna chauh hi a ni,” tiin kum 76 mi hian court-a a inlan hnuah a chenna, Florida-a Mar-a-Lago-a amah thlawptu pungkhawmte hmaah a sawi.
‘Thubuai phuahchawp’ hmanga an beihna chu Democratic party-in nakuma president thar thlan tur lo awm tura an phiarna vang mai mai a nih thu a sawi bawk.
Trump-a hian pundit leh dan thiam tumahin thubuai a neih theihna a awm lo niin a sawi tih a sawi bawk a, hei erawh a dik lo.
Court-a a chungthu ngaihtuah a nih lai hian Trump-a hi darkar khat dawn ngawi rengin a thu a, Judge Juan Merchan-a’n a zawhna chu ring tak zel chauhvin a chhang a, tih dik loh a neih loh thu pawh a sawi a. A chhuah hnuah pawh thuthar lakhawmtute hmachhawn miah lovin a kaltlang nghal bawk.
President hlui laka thubuai zingah hian kum 2016 president thlan dawn, a tlin tum khan mi ka hup nan a rukin $130,000 zet a pe chhuak nia puhna a tel.
Hetianga tih hi dan a nih lo va, thubuai ngaihtuahtu chuan Trump-a hian a sum chet vel dan chu dawt a phuah tih a sawi a, inthlana a sum sen zat nen a ruka a pekte hi a inmil theih nan a siam rem kual nia puh a ni.
A dan hre mi thin, amah ep zawnga tang ta, Michael Cohen chuan a pu hlui thu hian pawisate chu a pek chhuah thu a sawi.
An puhna tinah hian thiam loh a chang a nih chuan kum li zel tan theih a ni dawn a; mahse, judge hian Trump-a hi tang lovin a awmtir thei bawk.
An puhnaah hian thiam loh a chang dawn em tih engmah a la hriat loh va; mahse, tun thlenga thil thleng tawh hi America chanchina awm ngai lo a ni tawh hrim hrim.
Trump-a chungchang ngaihtuah tak tak hi January, 2024-ah tan a nih tur thu Judge Merchan chuan a sawi a. Hetah hian Republican pa hi court-ah a inlan leh pawh a la ngai dawn a, an party-in kum tawp inthlana president chuh tur an thlan vel lai a ni bawk ang.
A chungthu ngaihtuahtute hian pawisa dang an pek chhuahte pawh Trump-a thu angin, politics kaihhnawiha a chanchin tichhe thei thup nana tih a nih thu an sawi.
Trump-a hi a thubuaiah hian thiam loh changin hrem ni mah se president chuh a tumna emaw, Oval Office a luah emaw a dal dawn chuang lo va; a thubuai hi rei tak a kal dawn avangin Republican-ten president chuh tura an vawrh chhuah theih nana a beihna kawngah a kawng a tikhaihlak thei ang.